માથાદીઠ સુરક્ષા ખર્ચ 1% વધ્યો, તો ગુનાખોરી 0.36% ઘટી:એસબીઆઈનો 28 રાજ્યો પર અભ્યાસ, જ્યાં સીસીટીવી વધુ, ત્યાં ગુના ઓછા

દેશની અર્થવ્યવસ્થા અને ગુનાખોરી વચ્ચે ગાઢ સંબંધ છે. અપરાધમાં માત્ર 1% ઘટાડો થવાથી ટૂંકા ગાળામાં વાસ્તવિક જીડીપી (વિકાસ દર) 0.11% અને લાંબા ગાળામાં 0.133% સુધી વધે છે. એસબીઆઈ રિસર્ચે દેશના 28 રાજ્યોના અભ્યાસના આધારે આ નિષ્કર્ષ કાઢ્યો છે. જ્યારે સરકાર માથાદીઠ સુરક્ષા ખર્ચમાં 1% નો વધારો કરે છે, ત્યારે તે રાજ્યમાં અપરાધ દર લગભગ 0.36% ઘટી જાય છે. આનો અર્થ એ છે કે સુરક્ષા પાછળ જેટલો વધુ ખર્ચ થશે, ગુનાઓ તેટલા ઓછા થશે. જે શહેરોમાં સીસીટીવી કેમેરા દ્વારા જેટલો વધુ વિસ્તાર આવરી લેવામાં આવ્યો છે, ત્યાં અપરાધ પ્રમાણમાં ઓછા છે. જ્યાં મહિલાઓ વિરુદ્ધ અપરાધ જેટલા વધુ છે, ત્યાં કાર્યબળમાં તેમની ભાગીદારી ઓછી છે. ગયા વર્ષની સરખામણીમાં અપરાધ 6.0% ઓછો 2024માં દેશમાં કુલ 58.86 લાખ સંજ્ઞેય (હત્યા, દુષ્કર્મ વગેરે) ગુના નોંધાયા, જે પાછલા વર્ષની સરખામણીમાં 6.0% ઓછા છે. અખિલ ભારતીય ગુના દર પ્રતિ લાખ વસ્તીએ વર્ષ 2023ના 448.3 થી ઘટીને 2024માં 418.9 થયો છે. રાજ્યોમાં કેરળમાં પ્રતિ લાખ વસ્તીએ સૌથી વધુ 1,389 સંજ્ઞેય ગુના નોંધાયા. નાગાલેન્ડમાં પ્રતિ લાખ વસ્તીએ સૌથી ઓછા 61.6 ગુના નોંધાયા. મહિલાઓ વિરુદ્ધના ગુનાઓમાં 1.5% નો ઘટાડો થયો છે, જે 2023ના 4.48 લાખ કેસોથી ઘટીને 2024માં 4.41 લાખ રહ્યા છે. ગુનામાં આ ઘટાડાથી અર્થતંત્રને પણ ટેકો મળ્યો છે. આ આંકડા દર્શાવે છે કે હરિયાણા, બિહાર, પંજાબ અને બંગાળ જેવા રાજ્યો મહિલાઓ વિરુદ્ધના અપરાધોના મામલામાં રાષ્ટ્રીય સરેરાશ (64.6) થી ઉપર ચાલી રહ્યા છે. આનાથી ત્યાં મહિલા શ્રમ બળની ભાગીદારી પર નકારાત્મક અસર પડી છે. રાજસ્થાન અપવાદ છે, જ્યાં ક્રાઈમ રેટ વધુ છે, તેમ છતાં મહિલા વર્કફોર્સ 50%+ પર છે. એક સત્ય એ પણ... કેટલાક રાજ્યોમાં અપરાધ તો વધુ છે, પરંતુ FIR ન થવાથી આંકડા ઓછા છે નેશનલ ફેમિલી હેલ્થ સર્વેના આંકડાનો અંદાજ કહે છે કે ઘરેલું હિંસાના ઓછામાં ઓછા 5.94 લાખ કેસ પોલીસ પાસે પહોંચવા જોઈતા હતા. પરંતુ, NCRBના રેકોર્ડમાં પતિ કે સંબંધીઓની ક્રૂરતાના ફક્ત 1.21 લાખ પીડિતો જ નોંધાયા. 80% કેસ ગાયબ: આનો અર્થ એ થયો કે પોલીસના સંપર્કમાં આવતા સંભવિત કેસોમાંથી ફક્ત 20.4% જ કાગળો પર નોંધાઈ શક્યા. બંગાળનું અલગ ઉદાહરણ: ગુમ થયેલા બાળકોમાં તેનો રાષ્ટ્રીય હિસ્સો 16.11% અને હિંસક ગુનાઓમાં હિસ્સો 14.45% છે. પરંતુ ચોરી કે ઘરફોડ ચોરી વગેરેના આંકડા ઓછા નોંધાયેલા છે એટલે કે ઘણા કેસ નોંધાયા જ નથી.