રિપોર્ટ- IPLમાં કોહલી સૌથી વધુ કમાણી કરનાર ખેલાડી:રોહિત બીજા અને ધોની ત્રીજા નંબરે; ₹19,200 કરોડ સાથે કોલકાતા સૌથી મૂલ્યવાન ફ્રેન્ચાઇઝી

રોયલ ચેલેન્જર્સ બેંગલુરુ (RCB)ના સ્ટાર બેટર વિરાટ કોહલી IPL ઇતિહાસમાં સૌથી વધુ કમાણી કરનાર ખેલાડી બની ગયા છે. તેઓ ₹230 કરોડની કમાણી કરી ચૂક્યા છે. IPL 2008થી શરૂ થઈ છે અને આ વખતે તેની 19મી સીઝન છે. આ દાવો ફેનેટિક સ્પોર્ટ્સ અને હુરુન ઇન્ડિયાના તાજેતરના રિપોર્ટમાં કરવામાં આવ્યો છે. આ રિપોર્ટ વિશ્વના 53 દેશોના 504 શહેરોના 1,323 એલિટ એથ્લેટ્સ અને 6 સ્પોર્ટ્સ લીગના અભ્યાસ પર આધારિત છે. ફેનેટિક સ્પોર્ટ્સ એક ટિકિટિંગ અને હોસ્પિટાલિટી કંપની છે, જે રમતગમત સંબંધિત ટ્રાવેલ અને ઇવેન્ટ્સનું સંચાલન કરે છે. જ્યારે, હુરુન ઇન્ડિયા રિસર્ચ અને વેલ્યુએશન કંપની છે, જે ધનિકોની યાદી અને બિઝનેસ રિપોર્ટ્સ માટે જાણીતી છે. કોહલીએ રોહિત શર્મા અને એમએસ ધોનીને પાછળ છોડ્યા IPLના સૌથી ધનિક ખેલાડીઓની યાદીમાં વિરાટ કોહલી નંબર-1 પર છે. તેઓ 2008થી સતત રોયલ ચેલેન્જર્સ બેંગલુરુ (RCB) માટે રમી રહ્યા છે અને અત્યાર સુધી ₹230 કરોડનો પગાર લઈ ચૂક્યા છે. વિરાટ બ્રાન્ડ વેલ્યુના મામલે પણ લીગના સૌથી મોટા સ્ટાર છે. આ યાદીમાં મુંબઈ ઈન્ડિયન્સના પૂર્વ કેપ્ટન રોહિત શર્મા ₹227.2 કરોડની કમાણી સાથે બીજા નંબર પર છે. જ્યારે, ચેન્નઈ સુપર કિંગ્સ (CSK)ના મહેન્દ્ર સિંહ ધોની ₹200 કરોડના પગાર સાથે ત્રીજા સ્થાને છે. ધોની આજે પણ ભારતીય ક્રિકેટ અને IPLના મોટા કોમર્શિયલ આઇકન છે. મહિલાઓમાં મંધાના ટોચ પર વિમેન્સ ક્રિકેટમાં સ્મૃતિ મંધાના ₹13.7 કરોડની કમાણી સાથે ટોચ પર છે. દેશની ટોપ 10 મહિલા ક્રિકેટરોની કુલ કમાણી ₹90 કરોડ છે, જે વિરાટ કોહલીની IPL કમાણી ₹230 કરોડના અડધાથી પણ ઓછી છે. અન્ય રમતોમાં આ અંતર વધુ છે. કોલકાતા ટોચ પર, મુંબઈ-ચેન્નઈની વેલ્યુ બરાબર બોલિવૂડ એક્ટર શાહરૂખ ખાન અને જૂહી ચાવલાની કોલકાતા નાઈટ રાઈડર્સ (KKR)ની વેલ્યુ 19,200 કરોડ રૂપિયા છે. આ સાથે જ KKR દેશની સૌથી મૂલ્યવાન IPL ફ્રેન્ચાઈઝી બની ગઈ છે. આ પછી મુંબઈ ઈન્ડિયન્સ (MI) અને ચેન્નઈ સુપર કિંગ્સ (CSK) છે. બંને ટીમોનું વેલ્યુએશન લગભગ ₹18,400 કરોડ આંકવામાં આવ્યું છે. IPLની તમામ 10 ફ્રેન્ચાઈઝીનું કુલ વેલ્યુએશન હવે 1.63 લાખ કરોડ રૂપિયા પર પહોંચી ગયું છે. NFL અને EPLને ટક્કર આપી રહી છે ભારતીય લીગ રિપોર્ટ અનુસાર, IPL ફ્રેન્ચાઇઝીની આવક ટિકિટ, બ્રોડકાસ્ટિંગ રાઇટ્સ, સ્પોન્સરશિપ, મર્ચેન્ડાઇઝ, ડિજિટલ કન્ટેન્ટ અને ગ્લોબલ ફેન એન્ગેજમેન્ટથી આવી રહી છે. આ જ કારણોસર ભારતીય લીગ IPL હવે વેલ્યુએશનમાં અમેરિકાની નેશનલ ફૂટબોલ લીગ અને ઇંગ્લેન્ડની ઇંગ્લિશ પ્રીમિયર લીગને ટક્કર આપી રહી છે. IPL ફ્રેન્ચાઇઝીનું સરેરાશ વેલ્યુએશન 2032 સુધીમાં 1.8 અબજ ડોલરથી વધીને 15 અબજ ડોલર સુધી પહોંચી શકે છે. આનાથી ટીમોની વેલ્યુમાં અનેક ગણો વધારો થશે. હોકી ઇન્ડિયા લીગ: કેપ્ટન હરમનપ્રીતની કમાણી માત્ર ₹78 લાખ ભારતીય હોકી ટીમના કેપ્ટન હરમનપ્રીત સિંહ હોકી ઇન્ડિયા લીગ (HIL)માં સૌથી વધુ કમાણી કરનાર ખેલાડી છે, પરંતુ તેમની કમાણી માત્ર ₹78 લાખ છે. ફોરવર્ડ અભિષેક નૈનને ₹72 લાખ અને હાર્દિક સિંહને ₹70 લાખ મળે છે. આનાથી સ્પષ્ટ થાય છે કે ભારતના કોમર્શિયલ સ્પોર્ટ્સ માર્કેટ પર ક્રિકેટનું વર્ચસ્વ છે. આવકમાં મોટા તફાવત હોવા છતાં, હોકી જમીની સ્તરે પ્રતિભા તૈયાર કરવામાં અને લોકપ્રિયતા જાળવી રાખવામાં સફળ રહી છે. 14 વર્ષના કેતન કુશવાહા, 15 વર્ષના પૂર્તિ આશિષ તાની અને રાહુલ યાદવ જેવા ખેલાડીઓ તેનું ઉદાહરણ છે. ઓડિશાનો સુંદરગઢ દેશનો એકમાત્ર જિલ્લો છે, જેણે હુરુનની એલિટ રેન્કિંગમાં 12 મોટા એથ્લેટ આપ્યા છે. --------------------------------- IPL સંબંધિત આ સમાચાર વાંચો… મેચ હાર્યા બાદ લાઈવ ઈન્ટરવ્યૂમાં પંતે ગાળો ભાંડી!:વૈભવ સૂર્યવંશીએ ખોલ્યું ‘A’ સ્ટાઈલ સેલિબ્રેશનનું રાઝ, 'Baby Boss'એ રેકોર્ડ્સનો ઢગલો કર્યો; જુઓ મોમેન્ટ્સ રાજસ્થાન રોયલ્સે IPL 2026ની 64મી મેચમાં લખનઉ સુપર જાયન્ટ્સને 7 વિકેટે હરાવ્યું. જયપુરમાં રમાયેલી મેચમાં વૈભવ સૂર્યવંશીએ રેકોર્ડ્સનો ઢગલો કરી દીધો. મંગળવારે વૈભવ સૂર્યવંશી એક સીઝનમાં સૌથી વધુ સિક્સર ફટકારનાર બીજા બેટ્સમેન બન્યો. તેણે આન્દ્રે રસેલનો રેકોર્ડ તોડ્યો. વૈભવે ભારતીય તરીકે એક સીઝનના પાવરપ્લેમાં સૌથી વધુ રન બનાવ્યા. તેના નામે હવે 426 રન થઈ ગયા છે. સંપૂર્ણ સમાચાર વાંચો