અમેરિકામાં 60 વર્ષ પછી દેખાયા માંસ ખાઉ કીડા, હવે તેમની સામે લડવા 60 કરોડ માખીનું સૈન્ય ઉતારાશે

The Flesh-Eaters Are Back in America: કુદરત અનેક પ્રકારના રહસ્યો અને અજાયબીથી ભરેલી છે, પરંતુ ક્યારેક આ જ કુદરત મનુષ્યો અને પ્રાણીઓ માટે અત્યંત ભયાનક સ્વરૂપ ધારણ કરી લે છે. સામાન્ય રીતે આપણે હોલિવુડની સાયન્સ-ફિક્શન ફિલ્મોમાં જ એવા જીવો જોતા હોઈએ છીએ જે જીવતા શરીરનું માંસ ખાઈ જાય, પરંતુ હવે આ કાલ્પનિક ડર હકીકત બનીને અમેરિકાની ધરતી પર પાછો ફર્યો છે. આશરે 60 વર્ષ સુધી નામશેષ રહ્યા બાદ અમેરિકામાં સ્ક્રૂ વૉર્મ નામના કીડા ફરી દેખાયા છે, જે 'માંસ ખાઉ કીડા' (Flesh-eating worm) તરીકે પણ ઓળખાય છે. આ કીડાનું પુનરાગમન થતાં જ સરકારી તંત્રમાં દોડધામ મચી ગઈ છે. આ ખતરાને નાથવા માટે અમેરિકા હવે લાખો-કરોડો જંતુરહિત માખીઓ અને ખાસ તાલીમ પામેલા કૂતરાની મદદ લેવાઈ રહી છે.