વુમન્સ T20 વર્લ્ડ કપમાં નવમી વખત IND vs PAK:ટીમ ઈન્ડિયાએ ટૉસ જીતીને બેટિંગ લીધી; ભારતે 8 મેચ પછી ટૉસ જીત્યો

વુમન્સ T20 વર્લ્ડ કપમાં આજે ભારત અને પાકિસ્તાન વચ્ચે મેચ બર્મિંગહામના એજબેસ્ટન સ્ટેડિયમમાં રમાઈ રહી છે. જેમાં ભારતની કેપ્ટન હરમનપ્રીત કૌરે ટૉસ જીતીને બેટિંગ લીધી છે. આ ટુર્નામેન્ટમાં બંને ટીમની આ પહેલી મેચ છે. ભારત ગત T20 વર્લ્ડ કપમાં સેમિફાઈનલ સુધી પહોંચ્યું હતું, જ્યારે પાકિસ્તાનની ટીમ ગ્રુપ સ્ટેજથી આગળ વધી શકી નહોતી. ભારત અને પાકિસ્તાન વચ્ચે અત્યાર સુધીમાં કુલ 16 T20 મેચ રમાઈ છે, જેમાંથી ભારતે 13 અને પાકિસ્તાને 3 મેચ જીતી છે. T20 વર્લ્ડ કપમાં બંને ટીમ 8 વખત આમને-સામને આવી ચૂકી છે, જેમાં ભારતે 6 વખત જીત મેળવી છે, જ્યારે પાકિસ્તાન માત્ર 2 જ મેચ જીતી શક્યું છે. ગયા વર્ષે પહેલીવાર વન-ડે વર્લ્ડ કપ જીતનારી ભારતીય ટીમ હવે T20 વર્લ્ડ કપ જીતીને સતત બીજું ICC ટાઇટલ પોતાના નામે કરવા ઈચ્છશે. બીજી તરફ, પાકિસ્તાનની ટીમ તાજેતરમાં જ બાંગ્લાદેશને T20 સિરીઝમાં 3-0થી હરાવીને ટુર્નામેન્ટમાં પહોંચી છે.