61 વર્ષનો આમિર ખાન ત્રીજી વાર લગ્ન કરશે!:5 જુલાઇએ ગર્લફ્રેન્ડ ગૌરી સાથે લગ્ન કરશે તેવો દાવો, ગ્રાન્ડ રિસેપ્શનને બદલે ખાનગી સેરેમની યોજાશે

બોલિવૂડ એક્ટર આમિર ખાન અને તેની ગર્લફ્રેન્ડ ગૌરી સ્પ્રેટ ટૂંક સમયમાં લગ્નના બંધનમાં બંધાવા જઈ રહ્યા છે. 'હિન્દુસ્તાન ટાઈમ્સ'ના રિપોર્ટ અનુસાર, બંને આ વર્ષે 5 જુલાઈએ એક પ્રાઈવેટ સેરેમનીમાં લગ્ન કરશે. આ લગ્નમાં કોઈ ભવ્ય આયોજન કે ગ્રાન્ડ રિસેપ્શન રાખવામાં આવશે નહીં. અંગત સમારોહમાં સંબંધને સત્તાવાર નામ આપશે બંને એક નાની સાઈનિંગ સેરેમની દ્વારા પોતાના સંબંધોને ઓફિશિયલ કરશે. આમિર ખાને વર્ષ 2025માં પોતાના 60મા જન્મદિવસ પર ગૌરી સાથેના પોતાના રિલેશનશિપની વાત મીડિયા સામે કન્ફર્મ કરી હતી. આમિર ખાનના આ ત્રીજા લગ્ન હશે. આમિરે પહેલા લગ્ન વર્ષ 1986માં ફિલ્મ પ્રોડ્યુસર રીના દત્તા સાથે કર્યા હતા. વર્ષ 2002માં રીનાથી અલગ થયા પછી, આમિરે વર્ષ 2005માં ડિરેક્ટર કિરણ રાવ સાથે બીજા લગ્ન કર્યા હતા. વર્ષ 2021માં કિરણ અને આમિરના છૂટાછેડા થઈ ગયા હતા. એક વર્ષથી લિવ-ઇનમાં રહે છે કપલ મીડિયા રિપોર્ટ અનુસાર, આમિર અને ગૌરી છેલ્લા એક વર્ષથી પણ વધુ સમયથી લિવ-ઇન પાર્ટનર તરીકે સાથે રહી રહ્યા છે. સૂત્રો અનુસાર, બંને એક સાથે એક સુખી અને સ્થિર જીવન જીવી રહ્યા છે. હવે બંનેએ પોતાના પરિવારના સભ્યોની હાજરીમાં આ સંબંધને કાયદેસર રીતે આગળ વધારવાનો નિર્ણય કર્યો છે. કપલના લગ્ન અત્યંત ખાનગી હશે, જેમાં ફક્ત બંનેના પરિવારના સભ્યો અને ખૂબ જ નજીકના મિત્રો જ સામેલ થશે. ગૌરી સ્પ્રેટ સલૂન આંત્રપ્રિન્યોર અને ફેશન પ્રોફેશનલ છે ગૌરી સ્પ્રેટ બેંગલુરુની રહેવાસી સલૂન આંત્રપ્રિન્યોર અને ફેશન પ્રોફેશનલ છે. તે એક મિશ્ર સંસ્કૃતિના પરિવારમાંથી આવે છે, જેમાં તેના પિતા તમિલ-બ્રિટિશ મૂળના અને માતા પંજાબી-આઇરિશ મૂળના છે. ગૌરી 1920ના દાયકામાં ભારતના સ્વતંત્રતા આંદોલન સાથે સંકળાયેલા બ્રિટિશ સામ્યવાદી ફિલિપ સ્પ્રેટની પૌત્રી છે. તેણે યુનિવર્સિટી ઓફ ધ આર્ટ્સ લંડનમાંથી ફેશન અને સ્ટાઇલિંગનો અભ્યાસ કર્યો છે. હાલમાં તે મુંબઈમાં 'બીબ્લન્ટ' (BBlunt) સલૂન ચલાવે છે અને આ પહેલા બેંગલુરુમાં પણ સલૂન ચેઇન સાથે સંકળાયેલી હતી. મીડિયા રિપોર્ટ્સ અનુસાર તે હવે આમિર ખાન પ્રોડક્શન્સ સાથે પણ કામ કરી રહી છે. આમિર ખાનની જેમ ગૌરી પણ પહેલા પરિણીત હતી અને તેને 7 વર્ષનો એક દીકરો છે. બંને છેલ્લા બે વર્ષથી વધુ સમયથી મુંબઈમાં સાથે રહી રહ્યા છે. આમિર ખાન અને ગૌરી સ્પ્રેટ એકબીજાને છેલ્લા 25 વર્ષથી ઓળખે છે. બંને પહેલા ખૂબ સારા મિત્રો હતા, જે પછી તેમણે એકબીજાને ડેટ કરવાનું શરૂ કર્યું. જ્યારથી આમિર અને ગૌરીએ તેમના સંબંધોને સત્તાવાર કર્યા છે, ત્યારથી ગૌરીને અવારનવાર આમિર ખાન સાથે અલગ-અલગ ઇવેન્ટ્સ અને પ્રસંગોએ સાથે જોવામાં આવે છે. ગૌરીના આવવાથી આમિર પોતાને પૂર્ણ માને છે એક જૂના ઇન્ટરવ્યુમાં આમિર ખાને ગૌરી સાથેના પોતાના સંબંધો વિશે ખુલીને વાત કરી હતી. આમિરે કહ્યું હતું, “હું ખૂબ નસીબદાર છું કે મને ગૌરી મળી અને અમારો સંબંધ શરૂ થયો. તે શ્રેષ્ઠ છે અને તેમની સાથે મને ખૂબ શાંતિ મળે છે. જોકે, રીના દત્તા અને કિરણ રાવ સાથે પણ મારો સંબંધ ખૂબ ઊંડો હતો, પરંતુ વસ્તુઓ આગળ વધી શકી નહીં. હું પોતાને નસીબદાર માનું છું કે ગૌરી મારા જીવનમાં આવી. મને લાગે છે કે હવે હું પૂર્ણ થયો છું.” 2002માં થયા હતા પહેલા છૂટાછેડા આમિર ખાને પોતાના પહેલા લગ્ન વર્ષ 1986માં ફિલ્મ પ્રોડ્યુસર રીના દત્તા સાથે કર્યા હતા. આ એક લવ મેરેજ હતા, જે લગભગ 16 વર્ષ સુધી ચાલ્યા. બંનેને બે બાળકો, જુનૈદ ખાન અને આઇરા ખાન છે. વર્ષ 2002માં બંને કાયદેસર રીતે અલગ થઈ ગયા. આમિરે હાલમાં જ પોતાના આ સંબંધ તૂટવાનું મુખ્ય કારણ જણાવ્યું હતું. તેણે સ્વીકાર્યું કે તે સમયે તેઓ ભાવનાત્મક રીતે અપરિપક્વ હતા અને પોતાના કામમાં ખૂબ જ વ્યસ્ત રહેતા હતા. ફિલ્મો પ્રત્યે તેના વધુ ઝુકાવને કારણે તે પોતાના પરિવાર અને બાળકોને પૂરતો સમય આપી શક્યો નહીં, જેનાથી સંબંધોમાં અંતર વધી ગયું. રીનાથી અલગ થયા પછી આમિર ગંભીર ડિપ્રેશન અને નશાના સમયગાળામાંથી પણ પસાર થયો હતો. કિરણ રાવ સાથે બીજો સંબંધ, ફરી પરસ્પર સંમતિથી અલગ થયા રીના દત્તાથી છૂટાછેડા પછી આમિર ખાનના જીવનમાં ડિરેક્ટર કિરણ રાવ આવી. વર્ષ 2005માં બંનેએ લગ્ન કર્યા. આ લગ્નથી તેમનો એક પુત્ર આઝાદ છે, જેનો જન્મ IVF (આઈવીએફ) થી થયો હતો. લગ્નના 15 વર્ષ પછી, જુલાઈ 2021માં આમિર અને કિરણે અચાનક તેમના છૂટાછેડાની જાહેરાત કરીને બધાને ચોંકાવી દીધા હતા. પોતાના સંયુક્ત નિવેદનમાં તેમણે તેને એક સુવિચારિત આયોજન હેઠળ લેવાયેલો નિર્ણય ગણાવ્યો હતો. આમિરના મતે, સમયની સાથે પતિ-પત્ની તરીકે તેમના સંબંધોનો તાલમેલ બદલાઈ ગયો હતો. જોકે, છૂટાછેડા પછી પણ બંને વચ્ચે સન્માન અને મિત્રતા અકબંધ છે. તેઓ આજે પણ પોતાના દીકરાનો સાથે મળીને ઉછેર કરી રહ્યા છે અને પાણી ફાઉન્ડેશન સહિત અનેક ફિલ્મી પ્રોજેક્ટ્સ પર સાથે કામ કરે છે.