નરેન્દ્ર મોદીના PM તરીકેના 4399 દિવસ પૂરા:નેહરુનો રેકોર્ડ તૂટ્યો; કેન્દ્રીય મંત્રીઓએ ઊભા થઈને તાળીઓ પાડી, બંગાળ CM શુભેન્દુએ ઝાલમુરી ખવડાવી

નરેન્દ્ર મોદીએ 10 જૂને સતત સૌથી લાંબા સમય સુધી ચૂંટાયેલા વડાપ્રધાન બનવાનો રેકોર્ડ પોતાના નામે કર્યો છે. મોદીએ 26 મે 2014ના રોજ પીએમ પદના શપથ લીધા હતા. આજે તેમના કાર્યકાળના 4399 દિવસ પૂરા થયા છે. પીએમ તરીકે આ તેમનો મોદીનો ત્રીજો કાર્યકાળ છે. આ પહેલા સૌથી લાંબા સમય સુધી વડાપ્રધાન રહેવાનો રેકોર્ડ પૂર્વ પીએમ જવાહરલાલ નેહરુનો હતો. તેઓ 1952માં થયેલી પ્રથમ સામાન્ય ચૂંટણી પછી 4398 દિવસ સુધી આ પદ પર રહ્યા હતા. PM મોદીની આ સિદ્ધિ પર બપોરે 12.30 વાગ્યે કેન્દ્રીય મંત્રીમંડળની બેઠકમાં મંત્રીઓએ તેમના માટે ઊભા થઈને તાળીઓ પાડી હતી. સાથે જ એક વિશેષ પ્રસ્તાવ પણ પસાર કરવામાં આવ્યો હતો. ભારત મંડપમમાં NDAની બેઠકમાં પીએમ મોદીના સન્માનમાં એક વિશેષ પ્રસ્તાવ રજૂ કરવામાં આવશે. સૂત્રો અનુસાર, ભાજપ અધ્યક્ષ નીતિન નબીન આ પ્રસ્તાવ રજૂ કરશે, જેને આંધ્રપ્રદેશના મુખ્યમંત્રી એન. ચંદ્રબાબુ નાયડુ સમર્થન આપશે. બેઠકમાં ભાજપ-NDA શાસિત 22 રાજ્યો અને કેન્દ્રશાસિત પ્રદેશોના સીએમ, ડેપ્યુટી સીએમ સહિતના મુખ્ય નેતાઓ હાજર રહેશે. મોદી દેશના સૌથી લાંબા કાર્યકાળવાળા ચૂંટાયેલા પીએમ 15 ઓગસ્ટ 1947ના રોજ દેશ આઝાદ થયા પછી જવાહરલાલ નેહરુને વડાપ્રધાન નિયુક્ત કરવામાં આવ્યા હતા. તેઓ 15 ઓગસ્ટ 1947 થી 13 મે 1952 સુધી કુલ 1732 દિવસ પીએમ રહ્યા. ત્યારબાદ 1952માં દેશમાં પ્રથમ સામાન્ય ચૂંટણી થઈ. કોંગ્રેસ સત્તામાં આવી. સંસદીય દળે નેહરુને પોતાના નેતા તરીકે પસંદ કર્યા. ત્યારબાદ નેહરુ 13 મે 1952 થી 27 મે 1964 સુધી સતત ચૂંટાયેલા પીએમ રહ્યા. આ કાર્યકાળ 4398 દિવસનો રહ્યો હતો. આ રીતે ચૂંટાયેલા પીએમ તરીકે મોદી નેહરુથી આગળ નીકળી ગયા છે. વડાપ્રધાન મોદીના આ રેકોર્ડના દિવસભરના અપડેટ્સ જાણવા માટે નીચેના બ્લોગમાંથી પસાર થાઓ…