મનાલી-લેહ માર્ગમાં 3 ટનલ પ્રોજેક્ટ મંજૂર:15,550 કરોડના ખર્ચે બનશે; ગડકરીએ કહ્યું- આખા વર્ષ દરમિયાન લદ્દાખનો સંપર્ક ચાલુ રહેશે

કેન્દ્ર સરકારે મનાલી-લેહ વ્યૂહાત્મક માર્ગને આખા વર્ષ દરમિયાન ખુલ્લો રાખવા માટે ત્રણ ટનલ પ્રોજેક્ટને મંજૂરી આપી છે. આ ત્રણ ટનલનું નિર્માણ 15 હજાર 550 કરોડ રૂપિયાના ખર્ચે થશે. પ્રસ્તાવિત ટનલો હિમાચલના બારાલાચા, લાચુંગલા અને લદ્દાખના તંગલંગ લા ઘાટની નીચે બનાવવામાં આવશે. કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરીએ આ અંગે માહિતી આપતા જણાવ્યું કે આ ટનલના નિર્માણથી લદ્દાખનો આખા વર્ષ દરમિયાન રોડ માર્ગે સંપર્ક ચાલુ રહેશે, મુસાફરીના સમયમાં ઘટાડો થશે અને સરહદી વિસ્તારોમાં સેનાની અવરજવર અને લોજિસ્ટિક્સ સપ્લાયને અભૂતપૂર્વ મજબૂતી મળશે. વ્યૂહાત્મક દ્રષ્ટિએ ત્રણેય પ્રોજેક્ટ મહત્વપૂર્ણ છે. આ પરિયોજનાઓનો મુખ્ય ઉદ્દેશ્ય જમ્મુ-કાશ્મીર અને લદ્દાખમાં ચીન અને પાકિસ્તાન સાથેની સરહદો પર વ્યૂહાત્મક તૈયારીઓને વધુ મજબૂત કરવાનો છે. અટલ ટનલ, ઝોજિલા ટનલ અને પ્રસ્તાવિત શિંકુલા ટનલ પછી આ પરિયોજના પ્રાદેશિક કનેક્ટિવિટીને નવી મજબુતાઈ મળશે. બારાલાચા ઘાટની નીચે 13 કિલોમીટર લાંબી ટનલ પ્રોજેક્ટ હેઠળ બારાલાચા ઘાટ નીચે લગભગ 13 કિલોમીટર લાંબી સુરંગનું નિર્માણ કરવામાં આવશે. તેનો અંદાજિત ખર્ચ 8 હજાર 800 કરોડ રૂપિયા છે. પ્રોજેક્ટનો વિગતવાર રિપોર્ટ (ડીપીઆર) ઓક્ટોબર 2026 સુધીમાં તૈયાર થવાની સંભાવના છે. લાચુંગલામાં બનશે 11 કિલોમીટર લાંબી સુરંગ લાચુંગલા ઘાટ નીચે લગભગ 11 કિલોમીટર લાંબી સુરંગ પ્રસ્તાવિત છે, જેનો અંદાજિત ખર્ચ 4,500 કરોડ રૂપિયા આંકવામાં આવ્યો છે. આ પ્રોજેક્ટનો ડીપીઆર ડિસેમ્બર 2026 સુધીમાં પૂર્ણ થવાની અપેક્ષા છે. તંગલંગ લામાં 2250 કરોડ રૂપિયાનો ખર્ચ થશે લદ્દાખના તંગલંગ લા ઘાટ નીચે લગભગ પાંચ કિલોમીટર લાંબી ટનલનું નિર્માણ કરવામાં આવશે. આ પ્રોજેક્ટ પર 2,250 કરોડ રૂપિયા ખર્ચ થવાનો અંદાજ છે. તેનો ડીપીઆર માર્ચ 2027 સુધીમાં તૈયાર થવાની સંભાવના છે. વર્ષભર ખુલ્લો રહેશે મનાલી-લેહ માર્ગ નોંધનીય છે કે મનાલી-લેહ નેશનલ હાઈવે પર આવેલા બારાલાચા, લાચુલુંગ લા અને તંગલંગ લા જેવા ઊંચા ઘાટ ભારે હિમવર્ષા અને પ્રતિકૂળ હવામાનને કારણે વર્ષના ઘણા મહિનાઓ સુધી બંધ રહે છે. આ ઘાટ નીચે બનનારી ટનલો માત્ર હવામાન સંબંધિત અવરોધોને દૂર કરશે નહીં, પરંતુ મનાલી અને લેહ વચ્ચેનું અંતર લગભગ 50 કિલોમીટર સુધી ઘટાડશે. આ સાથે, મુસાફરીના સમયમાં પણ નોંધપાત્ર ઘટાડો થશે. નિષ્ણાતોના મતે, આ ટનલોના નિર્માણથી વ્યૂહાત્મક દૃષ્ટિએ સંવેદનશીલ લદ્દાખ ક્ષેત્ર સુધી દરેક ઋતુમાં અવિરત પહોંચ સુનિશ્ચિત થશે, જેનાથી સેનાની ઝડપી તહેનાતી અને પુરવઠા વ્યવસ્થા પહેલા કરતા વધુ અસરકારક બની શકશે.