કોલકાતાની સરકારી બિલ્ડિંગમાં આગ, 4 હજાર EVM બળી ગયા:મંત્રી બોલ્યા- 10 બેઠકો પર ઉપયોગમાં લેવાયા હતા, ષડયંત્રની આશંકા; TMC, AAP બોલ્યા- ભાજપ જવાબ આપે

પશ્ચિમ બંગાળના કોલકાતામાં એક સરકારી બિલ્ડિંગમાં આગ લાગવાથી લગભગ 4 હજાર EVM બળી ગયા. આ મશીનો આ વર્ષે થયેલી વિધાનસભા ચૂંટણીમાં 10 બેઠકો પર ઉપયોગમાં લેવાયા હતા. ઘટના બાદ TM એ ચૂંટણી પંચને સવાલો કર્યા છે. જ્યારે, કોંગ્રેસ અને AAP એ પણ સરકાર પાસેથી જવાબ માંગ્યો છે. પશ્ચિમ બંગાળ પોલીસે તપાસ માટે સ્પેશિયલ ઇન્વેસ્ટિગેશન ટીમ (SIT) બનાવી છે. બિલ્ડિંગમાં દક્ષિણ 24 પરગણા જિલ્લા પરિષદ સહિત અનેક સરકારી કચેરીઓ છે. આગ પર સંપૂર્ણ કાબૂ મેળવવામાં લગભગ 24 કલાક લાગ્યા. પશ્ચિમ બંગાળ સરકારના મંત્રી કૌશિક ચૌધરીએ કહ્યું કે આગ સામાન્ય લાગતી નથી. ષડયંત્રની આશંકાને નકારી શકાય નહીં. FIR નોંધીને તપાસ શરૂ કરી દેવામાં આવી છે. TMCએ કહ્યું- ચૂંટણી પંચ હંમેશા સવાલોથી બચી શકતું નથી TMCએ X પર આગનો વીડિયો શેર કરીને લખ્યું, "ચૂંટણી પંચ હંમેશા સવાલોથી બચી શકતું નથી. EVM અને CCTV ફૂટેજને સુરક્ષિત રાખવા માટે પહેલા કોર્ટનો દરવાજો ખખડાવવામાં આવ્યો હતો. તો પછી આવી ઘટના કેવી રીતે બની? શું આ માત્ર એક અકસ્માત હતો કે મહત્વના પુરાવાઓને નષ્ટ કરવાનો સુનિયોજિત પ્રયાસ?" TMCએ દાવો કર્યો કે આગમાં નષ્ટ થયેલી મશીનો કસબા, જાદવપુર, બેહાલા ઈસ્ટ, બેહાલા વેસ્ટ, મેટિયાબુરુજ, સતગછિયા અને ડાયમંડ હાર્બર સબ-ડિવિઝનની ઘણી વિધાનસભા બેઠકો સાથે સંકળાયેલી હતી. કોંગ્રેસે કહ્યું- સરકાર અને ચૂંટણી પંચે સ્પષ્ટ કરવું જોઈએ કે આગ કેવી રીતે લાગી અને નવમા-દસમા માળ સુધી કેવી રીતે પહોંચી? AAP એ કહ્યું- આખરે એવું શું થયું કે એક સરકારી ભવનમાં આટલી ભીષણ આગ લાગી ગઈ? આગ કેવી રીતે લાગી, અને હજારો EVM આ આગની ઝપેટમાં કેવી રીતે આવી ગયા, ભાજપ જવાબ આપે? મંત્રી બોલ્યા- ષડયંત્રની આશંકાને નકારી શકાય નહીં પશ્ચિમ બંગાળના ફાયર અને આપત્તિ વ્યવસ્થાપન રાજ્ય મંત્રી કૌશિક ચૌધરીએ જણાવ્યું કે આગ સૌથી પહેલા બીજા અને ત્રીજા માળે દેખાઈ હતી. ત્યારબાદ તે સાતમા, આઠમા, નવમા અને દસમા માળ સુધી પહોંચી ગઈ. તેમણે કહ્યું કે ચોથા, પાંચમા અને છઠ્ઠા માળને વધુ નુકસાન પહોંચાડ્યા વિના આગ ઉપર કેવી રીતે પહોંચી ગઈ? તપાસ કરવામાં આવી રહી છે કે તેની પાછળ કોઈ ષડયંત્ર તો નહોતું. ત્યાં, કેન્દ્રીય મંત્રી સુકાંત મજુમદારે કહ્યું કે ષડયંત્રની આશંકાને નકારી શકાય નહીં. BJP નેતા રાકેશ સિંહે તેને સુનિયોજિત ઘટના ગણાવી છે. જોકે, અત્યાર સુધી આ દાવાઓના સમર્થનમાં કોઈ પુરાવા સાર્વજનિક કરવામાં આવ્યા નથી. FIR નોંધાઈ, ફોરેન્સિક તપાસ શરૂ દક્ષિણ 24 પરગણા પ્રશાસનની ફરિયાદ પર અલીપુર પોલીસ સ્ટેશનમાં FIR નોંધવામાં આવી છે. પોલીસ આગનું કારણ શોધી રહી છે. હજુ એ સ્પષ્ટ નથી કે આગ શોર્ટ સર્કિટથી લાગી કે અન્ય કોઈ કારણસર. ફોરેન્સિક ટીમ ઘટનાસ્થળેથી નમૂના એકત્ર કરશે. તપાસમાં એ પણ જોવામાં આવશે કે આગ અકસ્માત હતો કે કોઈએ જાણી જોઈને લગાડી હતી.