Birthright Citizenship: આ કાયદો ગુલામોના બાળકો માટે ન કે ચીની અબજોપતિઓ માટે! આ મુદ્દે ભડક્યા ડોનાલ્ડ ટ્રમ્પ

યુએસ પ્રમુખ ડોનાલ્ડ ટ્રમ્પે અમેરિકામાં જન્મના આધારે મળતી આપમેળે નાગરિકતા (Birthright Citizenship) ના કાયદાને નાબૂદ કરવાના પોતાના વિવાદાસ્પદ એજન્ડાનો ફરી એકવાર જોરદાર આગ્રહ કર્યો છે. વ્હાઇટ હાઉસ ખાતે આયોજિત એક પ્રેસ કોન્ફરન્સ અને જાહેર કાર્યક્રમ દરમિયાન ટ્રમ્પે ઇતિહાસનો હવાલો આપીને એક મોટું નિવેદન આપ્યું હતું. ચીનના નહીં ગુલામોના બાળકો માટે આ કાયદો! મળતી માહિતી પ્રમાણે તેમણે કહ્યુ કે અમેરિકન ભૂમિ પર જન્મ લેતાની સાથે જ નાગરિકતા મળી જવાનો આ કાયદો મૂળભૂત રીતે ગુલામોના બાળકોના હિતોના રક્ષણ માટે બનાવવામાં આવ્યો હતો, નહીં કે ચીનના અબજોપતિઓના ફાયદા માટે. ટ્રમ્પે કાયદાની ટીકા કરતા ઉમેર્યું, આપણે દુનિયાનો કદાચ એકમાત્ર એવો દેશ છીએ જ્યાં આ પ્રકારની જન્મજાત નાગરિકતા હજી પણ અસ્તિત્વમાં છે. કોઈપણ વ્યક્તિ સરહદ પાર કરીને આપણા દેશમાં આવે છે અને અહીં બાળકનો જન્મ થતાં જ તે આપમેળે અમેરિકન નાગરિક બની જાય છે - આ વ્યવસ્થા ખોટી છે." ટ્રમ્પનું આ નિવેદન એવા સમયે આવ્યું છે જ્યારે યુએસ સુપ્રીમ કોર્ટ ટૂંક સમયમાં જ જન્મજાત નાગરિકતાના બંધારણીય અધિકારોને પડકારતા એક અત્યંત મહત્વપૂર્ણ કેસની સુનાવણી પૂરી કરીને ચુકાદો આપવા જઈ રહી છે. સુપ્રીમ કોર્ટ પર દબાણ અને ટીકા પોતાના કડક ઇમિગ્રેશન (સ્થળાંતર) એજન્ડાના ભાગરૂપે ડોનાલ્ડ ટ્રમ્પે સુપ્રીમ કોર્ટના ન્યાયાધીશોની ખુલ્લેઆમ આલોચના કરી છે. તેમણે સંકેત આપ્યો હતો કે કોર્ટ કદાચ તેમની વિચારધારાની વિરુદ્ધ જઈને જન્મજાત નાગરિકતાના વર્તમાન બંધારણીય રક્ષણોને જ યથાવત રાખશે. ટ્રમ્પે જણાવ્યું, "સુપ્રીમ કોર્ટનો આ નિર્ણય દેશના ભવિષ્ય માટે બહુ મોટો સાબિત થશે. તેઓ કદાચ મારી વિરુદ્ધ ચુકાદો આપશે, કારણ કે તેઓને મારી વિરુદ્ધ ચુકાદા આપવામાં આનંદ આવતો હોય તેવું લાગે છે. પરંતુ જો સુપ્રીમ કોર્ટ આ કાયદાને ચાલુ રહેવા દેશે, તો તે દેશ માટે શરમજનક બાબત હશે અને આનાથી અમેરિકા પર મોટો આર્થિક બોજ વધશે જે આર્થિક આપત્તિમાં પરિણમશે. ટ્રમ્પનો મોટો ઇમિગ્રેશન એજન્ડા આ કેસ હાલમાં કોર્ટ સમક્ષ ચાલી રહેલી સૌથી ગંભીર બાબતોમાંની એક છે. જોકે, સુપ્રીમ કોર્ટે હજુ સુધી સત્તાવાર રીતે સ્પષ્ટ કર્યું નથી કે આ મામલે અંતિમ ફેંસલો ક્યારે સંભળાવવામાં આવશે. ઉલ્લેખનીય છે કે, ગેરકાયદેસર ઘૂસણખોરી પર કડક નિયંત્રણો લાદવા અને દેશમાંથી બિનદસ્તાવેજીકૃત ઇમિગ્રન્ટ્સને હાંકી કાઢવાની ટ્રમ્પની નીતિનો આ એક મુખ્ય હિસ્સો છે. બીજી તરફ, આ જ સમયગાળા દરમિયાન સરહદી વિસ્તારો અને આંતરરાષ્ટ્રીય સ્તરે પણ સુરક્ષાને લઈને અનેક ગતિવિધિઓ ચાલી રહી છે, જેમાં પુલવામા હુમલા સાથે જોડાયેલા આતંકવાદી હમઝા બુરહાનની પાકિસ્તાનમાં અજ્ઞાત બંદૂકધારીઓ દ્વારા હત્યા અને હોર્મુઝ સ્ટ્રેટ (Strait of Hormuz) માં ફસાયેલા જહાજોની કટોકટી સામેલ છે, જેના પર યુએસ વહીવટીતંત્ર કડક નજર રાખી રહ્યું છે. આ પણ વાંચોઃ Crude Oil: દુનિયાનું ટેન્શન ખતમ! આ દેશ પાસે છે 303 અબજ બેરલ તેલનો ખજાનો