Gurugramમાં મધ્યરાત્રિએ મહા વીજ સંકટ, મુખ્ય ટ્રાન્સફોર્મર ફૂંકાતા એકસાથે 7 પાવર હાઉસ ઠપ્પ

દિલ્હીને અડીને આવેલા હરિયાણાના સાયબર સિટી ગુરુગ્રામમાં શુક્રવારની રાત્રે એકાએક બહુ મોટું વીજ સંકટ સર્જાયું છે. સેક્ટર-72માં આવેલા મુખ્ય પાવર હાઉસનું વિશાળ ટ્રાન્સફોર્મર અચાનક બળીને ખાખ થઈ જતાં ભારે અફરાતફરી મચી ગઈ છે. આ ટેક્નિકલ ખામીની અસર એટલી ભયંકર હતી કે આખી વીજ ચેઈન તૂટી ગઈ હતી અને તેની સાથે જોડાયેલા અન્ય 7 સબ-સ્ટેશનો એક પછી એક બંધ થઈ ગયા હતા. આ બ્લેકઆઉટને કારણે માત્ર હજારો ઘરોમાં જ અંધારપટ નથી છવાયો, પરંતુ ગુરુગ્રામની જીવાદોરી સમાન રેપિડ મેટ્રોની સેવા પણ એક કલાકથી વધુ સમય સુધી સંપૂર્ણપણે ઠપ્પ થઈ ગઈ હતી.એક ટ્રાન્સફોર્મર ફૂંકાયું અને 7 પાવર હાઉસમાં અંધારપટ મળતી વિગતો મુજબ, સેક્ટર-72માં આવેલું આ મુખ્ય વીજ ઘર 220 KVA ની ક્ષમતા ધરાવે છે, જે ગુરુગ્રામના એક બહુ મોટા હિસ્સાને વીજળી સપ્લાય કરે છે. આ પાવર હાઉસનું મુખ્ય ટ્રાન્સફોર્મર ફૂંકાતા જ સેક્ટર-15, સેક્ટર-38, સેક્ટર-44, સેક્ટર-46, સેક્ટર-52, સેક્ટર-56 અને મારુતિનું 66 KVA નું વીજ ઘર સંપૂર્ણપણે બંધ પડી ગયું હતું. આ પાવર હાઉસ બંધ થવાના કારણે સેક્ટર-38 થી લઈને સેક્ટર-57 સુધી, સેક્ટર-15 ના પાર્ટ-1 અને પાર્ટ-2 તેમજ સેક્ટર-18 ના વિસ્તારોમાં બત્તી ગુલ થઈ ગઈ હતી અને કરોડો રૂપિયાની કોર્પોરેટ ઓફિસો અને રહેણાંક સોસાયટીઓ અંધારામાં ડૂબી ગઈ હતી. સૌથી મોટી માઠી અસર રેપિડ મેટ્રો પર પડી આ પાવર કટની સૌથી મોટી માઠી અસર રેપિડ મેટ્રો પર પડી હતી. રોજિંદા હજારો મુસાફરોથી ઉભરાતી મેટ્રોમાં અચાનક પાવર સપ્લાય બંધ થતાં ટ્રેનો જ્યાંની ત્યાં જ અટકી પડી હતી. મેટ્રો સ્ટેશનો અને ટ્રેનની અંદર ફસાયેલા હજારો મુસાફરો ભારે ગરમી અને અંધારાના કારણે આકુળ-વ્યાકુળ થઈ ગયા હતા અને એક કલાકથી વધુ સમય સુધી મુસાફરો ભારે હાલાકીમાં મુકાયા હતા.  8 થી 10 કલાક બાદ જનજીવન સામાન્ય થશે હવે સૌથી મોટો સવાલ એ છે કે ગુરુગ્રામમાં વીજળી ક્યારે પૂર્વવત થશે? આ અંગે વીજ વિભાગના ઉચ્ચ અધિકારીઓએ જણાવ્યું છે કે બળી ગયેલા ભારે-ભરખમ ટ્રાન્સફોર્મરને સંપૂર્ણપણે રીપેર કરવામાં કે બદલવામાં ઓછામાં ઓછો 8 થી 10 કલાકનો સમય લાગશે. આનો અર્થ એ થયો કે મોડી રાત કે વહેલી સવાર સુધી લોકોને અસહ્ય ગરમી અને અંધારામાં જ રહેવું પડશે. વીજ કંપનીઓની ટીમો હાલમાં યુદ્ધના ધોરણે કામગીરી કરી રહી છે.આ પણ વાંચો----     Vadodara : MLA અક્ષય પટેલના પુત્ર રિશી પટેલ સહિત 5 સામે ગુનો દાખલ, ડીઝલ ચોરીના આક્ષેપ સાથે માર માર્યાનો આરોપ