Meta layoffs : મેટામાં છટણીનો હાહાકાર! 16 હજાર કર્મચારીઓની જશે નોકરી, કારણ શું?

દેશ અને દુનિયામાં મોટા પાયે જાણીતી કંપનીઓ છટણી કરી રહી છે. ગૂગલ અને ઓરેકલ જેવી કંપનીઓએ મોટી સંખ્યામાં કર્મચારીઓને છૂટા કર્યા છે. પરંતુ હવે ફરી એકવાર મેટા પ્લેટફોર્મ્સ મોટા પાયે છટણીની તૈયારીમાં છે, જેના કારણે આગામી મહિનાઓમાં લગભગ 16,000 કર્મચારીઓએ પોતાની નોકરી ગુમાવવી પડી શકે છે. રોઇટર્સના એક અહેવાલ અનુસાર, આ બાબત સાથે જોડાયેલા સૂત્રોને ટાંકીને જણાવવામાં આવ્યું છે કે, પ્રથમ તબક્કાની શરૂઆત 20 મેથી થવાની અપેક્ષા છે, જેમાં લગભગ 8,000 કર્મચારીઓને નોકરીમાંથી કાઢી મૂકવામાં આવશે. મેટામાં કર્મચારીઓની ઘરભેગા કરવાની તૈયારી!વર્ષ 2026માં થનારી આ છટણી મેટા કંપનીનો અત્યાર સુધીનો સૌથી મોટો ફેરફાર સાબિત થઈ શકે છે. માર્ક ઝુકરબર્ગ હવે પોતાની કંપનીને સંપૂર્ણ રીતે AI (આર્ટિફિશિયલ ઈન્ટેલિજન્સ) પર કેન્દ્રિત કરવા માંગે છે. આ માટે તેઓ માણસોને બદલે મશીની સિસ્ટમ (ઓટોમેશન)ને વધુ મહત્વ આપી રહ્યા છે, જેના કારણે જૂના વર્કફોર્સને હટાવીને કંપનીનું નવું માળખું તૈયાર કરવામાં આવી રહ્યું છે. દુનિયાભરના 10 ટકા કર્મચારીઓ પ્રભાવિત થઈ શકે છે મેટામાં છટણીની શરૂઆતમાં જ વિશ્વભરના લગભગ 10% કર્મચારીઓની નોકરી જઈ શકે છે. જોકે કંપનીએ હજુ સુધી ચોક્કસ આંકડો આપ્યો નથી, પરંતુ અહેવાલો મુજબ 2026ના અંત સુધી આ સિલસિલો ચાલુ રહેશે. કુલ મળીને લગભગ 16,000 કર્મચારીઓને કાઢી શકાય છે. અહેવાલ મુજબ, મેટાના ઉચ્ચ અધિકારીઓ નક્કી કરી રહ્યા છે કે કયા કર્મચારીઓને કાઢવા. આ માટે તેઓ જોઈ રહ્યા છે કે કોણ કેટલું સારું કામ કરી રહ્યું છે અને AI ના આવવાથી કામ પર શું અસર પડશે. માર્ક ઝુકરબર્ગ પહેલા જ કહી ચુક્યા છે કે હવે કંપનીનું પૂરું ધ્યાન AIની દુનિયામાં વિશ્વમાં સૌથી આગળ નીકળવા પર છે. આ નવા લક્ષ્યને પૂર્ણ કરવા માટે કંપની ઘણો પૈસો ખર્ચી રહી છે. આ વર્ષે અંદાજે 135 બિલિયન ડોલરનું રોકાણ કરવામાં આવશે. આ પૈસા ડેટા સેન્ટર બનાવવા, પાવરફુલ ચિપ્સ ખરીદવા અને નવા સોફ્ટવેર બનાવવા માટે વપરાશે. પહેલા પણ કરી ચૂક્યું છે છટણી જો મેટા હવે છટણી કરે છે, તો તે છેલ્લા કેટલાક વર્ષોથી ચાલી રહેલા છટણીના સિલસિલાનો આગામી ભાગ હશે. આ 2022 અને 2023ની યાદ અપાવે છે જ્યારે કંપનીએ લગભગ 21,000 લોકોને નોકરીમાંથી કાઢી મૂક્યા હતા. તે સમયે ઝુકરબર્ગે તેને 'કાર્યક્ષમતાનું વર્ષ' (Year of Efficiency) કહ્યું હતું, જેનો હેતુ બિનજરૂરી ખર્ચ ઘટાડવાનો અને કંપનીને ફરીથી પાટા પર લાવવાનો હતો. કોરોનાના સમયગાળામાં કંપનીએ જરૂર કરતાં વધુ લોકોની ભરતી કરી હતી, પરંતુ પછીથી અપેક્ષા મુજબની કમાણી થઈ ન હતી. શેરબજારમાં ઘટતી શાખ અને ખોટા અંદાજોને કારણે કંપનીએ આ કડક પગલાં લેવા પડ્યા હતા. સીધા કામ પર કરી રહી છે ફોકસ મેટા હવે પોતાની કંપનીને નાની અને સ્માર્ટ બનાવવાનો પ્રયાસ કરી રહી છે. તેઓ મેનેજમેન્ટની લાંબી લાઈનોને ખતમ કરી રહ્યા છે જેથી કામ સીધું અને ઝડપથી થઈ શકે. હવે માણસો કરતાં AI પર વધુ ભરોસો કરવામાં આવી રહ્યો છે. કંપનીની અંદર ફેરફારો શરૂ થઈ ગયા છે. ઘણા એન્જિનિયરોને હવે એવા પ્રોજેક્ટ્સમાં લગાવી દેવામાં આવ્યા છે જ્યાં તેઓ એવી સિસ્ટમ બનાવી રહ્યા છે જે આપોઆપ કોડિંગ અને મુશ્કેલ કામ કરી શકે. સાથે જ કેટલીક નવી ટીમો માત્ર એટલા માટે બનાવવામાં આવી છે જેથી તેઓ વહેલી તકે નવા AI ઉત્પાદનો બજારમાં ઉતારી શકે. વર્ષ 2026ની સૌથી મોટી છટણી આ બદલાવમાં મેટા એકલી નથી. આ ફેરફારોની અસર તમામ ટેક કંપનીઓ પર પડી રહી છે, જ્યાં અગ્રણી કંપનીઓ નોકરીઓમાં કાપ મૂકી રહી છે અને સાથે સાથે AIમાં રોકાણ વધારી રહી છે. ઉદાહરણ તરીકે, એમેઝોને કથિત રીતે હાલના મહિનાઓમાં લગભગ 30,000 કોર્પોરેટ હોદ્દાઓ નાબૂદ કર્યા છે, જે તેના કુલ કર્મચારીઓના લગભગ 10 ટકા છે. તેવી જ રીતે ફિનટેક ફર્મ બ્લોકે પણ તેના કર્મચારીઓની સંખ્યામાં ઘણો ઘટાડો કર્યો છે. Layoffs.fyi ના આંકડાઓ અનુસાર, આ વર્ષે અત્યાર સુધીમાં વૈશ્વિક સ્તરે 95 કંપનીઓમાં 73,000 થી વધુ ટેક કર્મચારીઓને નોકરીમાંથી કાઢી મૂકવામાં આવ્યા છે. આ પણ વાંચો- YouTube Biggest Record: બાપ રે! આ ગીતને મળ્યા 1600 કરોડ વ્યુઝ, 3 વર્ષ પહેલા કેદીઓને કરાતા હતા ટોર્ચર!