Umar Khalidને ત્રણ દિવસના શરતી જામીન, માત્ર એક મોબાઈલ રાખવાની મંજૂરી

દિલ્હી હાઇકોર્ટે જણાવ્યુ છે કે, કેસના સંજોગો અને માનવતાવાદી પાસાઓને ધ્યાનમાં રાખી જામીન અપાયા છે. માતાની સર્જરી હોવાથી જામીન દિલ્હી હાઈકોર્ટે 2020ના દિલ્હી રમખાણોના આરોપી ઉમર ખાલિદને 3 દિવસના વચગાળાના જામીન આપ્યા છે. આ રાહત તેની માતાની સર્જરીને ધ્યાનમાં રાખીને આપવામાં આવી છે. કેસમાં મોટા કાવતરાના આરોપો વચ્ચે કોર્ટે આ કામચલાઉ જામીન આપ્યા હતા. કોર્ટે તેની માતાના સ્વાસ્થ્યને ધ્યાનમાં રાખીને આ નિર્ણય લીધો હતો. ઉમર ખાલિદ UAPA હેઠળ લાંબા સમયથી જેલમાં છે. દિલ્હી પોલીસની દલીલ એડિશનલ સોલિસિટર જનરલ એસ.વી. રાજુએ જણાવ્યું હતું કે, ખાલિદની માતાની સર્જરી નાની હતી અને તેની બહેનો તેની સંભાળ રાખવા માટે હાજર હતી. તેમણે એવું પણ સૂચન કર્યું કે, જો જરૂરી હોય તો, ખાલિદને પોલીસ એસ્કોર્ટ સાથે એક દિવસ માટે તેણીને મળવાની મંજૂરી આપી શકાય. આ માટે લાંબા વચગાળાના જામીનની જરૂર નહોતી. બંને પક્ષોને સાંભળ્યા પછી, કોર્ટે, આ બાબત પર સહાનુભૂતિપૂર્વક વિચાર કરીને, વચગાળાના જામીન આપવાનો નિર્ણય લીધો હતો. કોર્ટની મુખ્ય શરતો 1. મોબાઇલ ફોન પર કડક દેખરેખ: કોર્ટે સ્પષ્ટ કર્યું કે વચગાળાના જામીન સમયગાળા દરમિયાન, ઉમર ખાલિદ પાસે ફક્ત એક જ મોબાઇલ ફોન હશે. તે ફક્ત આ ફોન દ્વારા સંપર્કમાં રહેશે. તેને એકથી વધુ મોબાઇલ ફોન રાખવાની મંજૂરી આપવામાં આવશે નહીં. 2. તપાસ અધિકારી સાથે સતત સંપર્કઃ ઉમર ખાલિદે ત્રણ દિવસના સમયગાળા દરમિયાન તપાસ અધિકારી સાથે સતત સંપર્કમાં રહેવું પડશે. તેણે IOના કોઈપણ કોલ, સંદેશા અથવા સૂચનાઓનું તાત્કાલિક પાલન કરવું પડશે. 3. ગુનાહિત પ્રવૃત્તિઓથી દૂર રહેવું: કોર્ટે સ્પષ્ટપણે જણાવ્યું હતું કે વચગાળાના જામીન સમયગાળા દરમિયાન ઉમર ખાલિદ કોઈપણ ગુનાહિત પ્રવૃત્તિઓમાં સામેલ થશે નહીં. જો તેની સામે કોઈ ગુનાહિત પ્રવૃત્તિનો આરોપ છે, તો તે જામીન રદ કરવા માટેનું કારણ બની શકે છે. 4. મર્યાદિત મુદતના જામીન: કોર્ટે સ્પષ્ટ કર્યું કે, આ વચગાળાના જામીન ફક્ત ત્રણ દિવસ માટે છે. 1 જૂનથી 3 જૂન સુધી. આ સામાન્ય કે નિયમિત જામીન નથી. પરંતુ તેની માતાની સર્જરી અને કૌટુંબિક સમારોહને ધ્યાનમાં રાખીને આપવામાં આવેલી મર્યાદિત રાહત છે. 5. અંતિમ આદેશમાં વિગતવાર શરતો: કોર્ટે એમ પણ જણાવ્યું હતું કે, અંતિમ લેખિત આદેશમાં વિગતવાર શરતો નોંધવામાં આવશે. આનો અર્થ એ છે કે શક્ય છે કે વધુ શરતો લાદવામાં આવી શકે છે. જેમ કે સ્થાનની માહિતી જાહેર કરવી, કોઈ ચોક્કસ સ્થળ ન છોડવું, અથવા કોર્ટની પરવાનગી વિના શહેર છોડવું નહી. કોર્ટે સંકેત આપ્યો છે કે, આદેશમાં વધુ શરતો ઉમેરવામાં આવશે. આ પણ વાંચોઃ Pathankotમાં Pakistan માટે જાસૂસીનો મામલો આવ્યો સામે, લાઈવ ફૂટેજ મોકલતા પંજાબ પોલીસે કરી કાર્યવાહી