એક્ટ્રેસ ટ્વિશાના મોત પહેલાંનો વધુ એક VIDEO:બ્યુટી પાર્લરમાં હેડ મસાજ કરાવતી જોવા મળી, મૃતદેહ મળ્યો ત્યાંની તસવીર સામે આવી; પતિ 7 દિવસના રિમાન્ડ પર

ભોપાલમાં મૃત્યુ પહેલાં એક્ટ્રેસ-મોડલ ટ્વિશા શર્માના છેલ્લા મેકઅપના CCTV ફૂટેજ સામે આવ્યા છે. તેમાં તે સાસરીની નજીક આવેલા એક બ્યુટી પાર્લરમાં તૈયાર થતી જોવા મળી રહી છે. વીડિયોમાં ટ્વિશા ખૂબ જ રિલેક્સ દેખાઈ રહી છે. પોલીસે આ ફૂટેજ પણ જપ્ત કર્યું છે. બ્યુટી પાર્લર ટ્વિશાના સાસરીથી માત્ર 100 મીટરના અંતરે છે. ભોપાલના કટારા હિલ્સ સ્થિત ટ્વિશાના ઘરના તે ભાગની તસવીર પણ સામે આવી છે, જ્યાં તેની ડેડબોડી મળી હતી. તપાસ દરમિયાન એ પણ જાણવા મળ્યું છે કે ટ્વિશાએ 12 મેના રોજ સવારે 9.52 વાગ્યે ભોપાલ-જયપુર એક્સપ્રેસમાં રિઝર્વેશન કરાવ્યું હતું. ટ્વિશા 15 મેના રોજ અજમેર જવાની હતી, જ્યાં તેના ભાઈ મેજર હર્ષિત શર્માની પોસ્ટિંગ છે. બીજી તરફ, શુક્રવારે મોડી રાત્રે લગભગ 2 વાગ્યે પોલીસ ટ્વિશાના પતિ સમર્થ સિંહને જબલપુરથી ભોપાલ લઈને પહોંચી. હાલમાં, તેને કટારા હિલ્સ પોલીસ સ્ટેશનમાં રાખવામાં આવ્યો છે. પોલીસ સ્ટેશનની બહાર બેરિકેડિંગ કરીને પોલીસ તૈનાત કરવામાં આવ્યા છે. પોલીસના જણાવ્યા અનુસાર, મેડિકલ પરીક્ષણ પછી સમર્થને અનુદિત ગુપ્તાની કોર્ટમાં રજૂ કરવામાં આવશે. જ્યાં તેની રિમાન્ડ માંગવામાં આવશે. પિયર પક્ષે લગાવ્યો છે હત્યાનો આરોપ જણાવી દઈએ કે ટ્વિશા શર્માનું 12 મેના રોજ સાસરીમાં શંકાસ્પદ સંજોગોમાં મૃત્યુ થયું હતું. તે ભોપાલના કટારા હિલ્સ સ્થિત બાગમુગાલિયા એક્સટેન્શનમાં રહેતા નિવૃત્ત જજ ગિરિબાલાની પુત્રવધૂ હતી. પતિ સમર્થ સિંહ વકીલ છે. સાસરી પક્ષે ફાંસી લગાવીને આત્મહત્યા કરવાની વાત કહી હતી, જ્યારે પિયર પક્ષે સાસુ અને પતિ પર હત્યાનો આરોપ લગાવ્યો હતો. ટ્વિશાની વોટ્સએપ ચેટ પણ વાયરલ થઈ છે. તેમાં તેણે લખ્યું હતું- મને બહુ ગૂંગળામણ થાય છે મા… આ લોકો ન તો રડવા દેશે, ન તો હસવાનું કારણ આપશે. જુઓ, ત્રણ તસવીરો… સમર્થ સિંહનું વકીલાત લાઇસન્સ સસ્પેન્ડ ટ્વિશા શર્માનો પતિ સમર્થ સિંહ શુક્રવારે જબલપુર જિલ્લા કોર્ટમાં આત્મસમર્પણ કરવા પહોંચ્યો. અહીં ભોપાલ પોલીસે તેને અરેસ્ટ કરી લીધો. આ દરમિયાન મીડિયાએ તેની સાથે વાતચીત કરવાનો પ્રયાસ કર્યો, પરંતુ તે સંપૂર્ણપણે મૌન રહ્યો. બાર કાઉન્સિલ ઓફ ઇન્ડિયા (BCI) એ વકીલ સમર્થ સિંહનું વકીલાતનું લાઇસન્સ શુક્રવારે તાત્કાલિક અસરથી સસ્પેન્ડ કરી દીધું. BCI ચેરમેન મનન કુમાર મિશ્રાએ તેના આદેશ આપ્યા. સમર્થને ઘટનાવાળા દિવસની વિગતો પૂછશે પોલીસ ACP રજનીશ કશ્યપ કૌલના નેતૃત્વમાં SIT કેસની તપાસ કરી રહી છે. પોલીસનું કહેવું છે કે સમર્થને ભોપાલ લાવ્યા બાદ તેની વિસ્તૃત પૂછપરછ કરવામાં આવશે. પોલીસ એ જાણવાનો પ્રયાસ કરશે કે ફરાર હતો ત્યારે તે ક્યાં-ક્યાં રહ્યો અને કયા લોકોએ તેની મદદ કરી? તપાસમાં સહયોગ કરનારાઓની ભૂમિકા પણ તપાસવામાં આવશે અને દોષિત ઠરવા પર તેમની વિરુદ્ધ કાર્યવાહી કરવામાં આવશે. આ ઉપરાંત, સમર્થ પાસેથી ઘટનાવાળા દિવસની સંપૂર્ણ જાણકારી પણ લેવામાં આવશે, જેથી કેસની તમામ કડીઓ સ્પષ્ટ થઈ શકે. ઓળખ છુપાવવા માટે સમર્થે ફરારી દરમિયાન પોતાનો દેખાવ પણ બદલી નાખ્યો હતો. હંમેશા ક્લીન શેવ રહેતો સમર્થ હળવી દાઢીમાં જોવા મળ્યો. સામાન્ય રીતે ફોર્મલ લુકમાં રહેતો સમર્થ આ વખતે કેઝ્યુઅલ જીન્સ-શર્ટ અને કેપમાં દેખાયો. તેણે ચહેરા પર માસ્ક પણ પહેર્યો હતો. પોલીસ કમિશનર સંજય કુમારનું કહેવું છે કે જ્યાં સુધી મામલો કોઈ બીજી તપાસ એજન્સીને ટ્રાન્સફર કરવામાં ન આવે ત્યાં સુધી પોલીસ દરેક એંગલથી તપાસ ચાલુ રાખશે અને નિયમાનુસાર કાર્યવાહી કરવામાં આવશે. પોલીસ પર સંરક્ષણ આપવાનો આરોપ ટ્વિશાના જીજાજી સૌરભ શર્માએ આરોપ લગાવ્યો છે કે શરૂઆતથી જ અમે કહેતા આવ્યા છીએ કે આરોપી સમર્થ અને તેની માતા ગિરિબાલા પ્રભાવશાળી છે. તેમને ભોપાલ પોલીસનું સંરક્ષણ મળી રહ્યું છે. અમારા પરિવારને સતત ગેરમાર્ગે દોરવામાં આવ્યો. ટ્વિશાના મૃત્યુ પછી પરિવારના નિવેદનો નોંધવામાં આવ્યા, પરંતુ બાદમાં કહેવામાં આવ્યું કે નિવેદનો યોગ્ય રીતે નોંધાયા નથી. આ પછી ફરીથી નિવેદનો લેવામાં આવ્યા અને પરિવારને કલાકો સુધી પોલીસ સ્ટેશનમાં બેસાડી રાખવામાં આવ્યો. આ બધું માનસિક દબાણ બનાવવા માટે કરવામાં આવ્યું. કોર્ટ રૂમમાં માસ્ક લગાવીને બેઠો રહ્યો સમર્થ સૌરભે કહ્યું કે સમર્થની ધરપકડને લઈને માત્ર કાગળની ઔપચારિકતાઓ પૂરી કરવામાં આવી. પોલીસે ઇનામ જાહેર કર્યું, લુકઆઉટ નોટિસ પણ જાહેર કરી પરંતુ આરોપીની ધરપકડ કરવામાં આવી નહીં. આમ છતાં સમર્થ ભોપાલથી જબલપુર સુધી રોડ માર્ગે પહોંચી ગયો. કોર્ટ રૂમમાં માસ્ક લગાવીને બેઠો રહ્યો. સૌરભે દાવો કર્યો કે તેમના વકીલે સમર્થને ઓળખી લીધો, ત્યારબાદ ત્યાં હાજર કેટલાક વકીલોએ હોબાળો શરૂ કરી દીધો. આ પછી તેની ધરપકડ થઈ. તેમણે સવાલ ઉઠાવ્યો કે જ્યારે ભોપાલ પોલીસ પહેલાથી જ કોર્ટમાં હાજર હતી, ત્યારે તેમને આરોપી કેમ દેખાયો નહીં? તેના પરથી સ્પષ્ટ થાય છે કે સમર્થનું સરેન્ડર સંપૂર્ણપણે સ્ક્રિપ્ટેડ હતું. સૌરભે કટારા હિલ્સ પોલીસ સ્ટેશનના પ્રભારી સુનીલ દુબે અને સ્ટાફ પર પણ ગેરવર્તણૂકનો આરોપ લગાવ્યો. તેમનું કહેવું છે કે ભોપાલ પોલીસની છબી ખરાબ કરનારા કર્મચારીઓ વિરુદ્ધ અત્યાર સુધી કાર્યવાહી કેમ કરવામાં આવી નથી? સાસરી પક્ષે મૃતદેહ સોંપવાની માગ કરી હતી જબલપુર હાઈકોર્ટમાં શુક્રવારે સુનાવણી દરમિયાન સમર્થ સિંહ તરફથી હિંદુ રીતિ-રિવાજોનો હવાલો આપતા ટ્વિશા શર્માનો મૃતદેહ સોંપવાની માગ કરવામાં આવી. કોર્ટે આ માંગણી ફગાવી દીધી. કોર્ટે ભોપાલ કોર્ટ પાસેથી જામીન આદેશની નકલ પણ મંગાવી છે. જ્યારે, રાજ્ય સરકાર તરફથી મહાધિવક્તા પ્રશાંત સૈનીએ ફરીથી પોસ્ટમોર્ટમ કરાવવા પર કોઈ વાંધો ઉઠાવ્યો નથી. બીજી તરફ, હાઈકોર્ટે નિવૃત્ત જજ ગિરિબાલા સિંહને પણ નોટિસ ફટકારી છે. ટ્વિશાના પિતા નવનિધિ શર્માએ તેમની આગોતરા જામીન રદ કરવાની માગ સાથે અરજી દાખલ કરી છે. મૃતદેહનું ફરીથી પોસ્ટમોર્ટમ કરાવવાનો આદેશ મધ્યપ્રદેશ હાઈકોર્ટે ટ્વિશા શર્માના મૃતદેહનું ફરીથી પોસ્ટમોર્ટમ કરાવવાનો આદેશ આપ્યો છે. કોર્ટે શુક્રવારે જણાવ્યું હતું કે દિલ્હી AIIMSના ડાયરેક્ટરના નેતૃત્વમાં એક ટીમ ભોપાલ AIIMSમાં પોસ્ટમોર્ટમ કરશે. આખી પ્રક્રિયાની વીડિયોગ્રાફી પણ કરવામાં આવશે. ત્યાં સુધી પોલીસને મૃતદેહ સુરક્ષિત રાખવાનો નિર્દેશ આપવામાં આવ્યો છે. આ તરફ, મધ્યપ્રદેશ સરકારે આ કેસની CBI તપાસ માટે કેન્દ્ર સરકારને પત્ર લખીને તપાસ માટે સંમતિ આપી છે. 20 મેના રોજ ટ્વિશાના પિતા નવનિધિ શર્મા નિવૃત્ત સૈનિકો સાથે મુખ્યમંત્રી ડો. મોહન યાદવને મળવા પહોંચ્યા હતા, ત્યારે મુખ્યમંત્રીએ તપાસનું આશ્વાસન આપ્યું હતું. ગિરિબાલાના જામીન વિરુદ્ધ બે અરજીઓ સમર્થના વકીલ જયદીપ કૌરવે જબલપુરમાં કહ્યું- કોર્ટ સમક્ષ ટ્વિશાના કેસમાં ચાર કેસ એકસાથે દાખલ થયા હતા. એક સમર્થની આગોતરા જામીન અરજી હતી. બીજી ટ્વિશાના પિતા તરફથી ફરીથી પોસ્ટમોર્ટમ માટેની રિટ અરજી હતી. બે જામીન રદ કરવાની અરજીઓ દાખલ થઈ હતી, જે ગિરિબાલાના જામીન વિરુદ્ધ હતી. તેમણે જણાવ્યું કે કોર્ટે આ મામલે નોટિસ જાહેર કરી છે. તેમની પાસેથી જવાબ માંગ્યો છે. આગળની સુનાવણી 25 મેના રોજ બપોરે 2:30 વાગ્યે થશે. તેમને કોર્ટ સમક્ષ જવાબ આપવાનો છે. સમર્થની અરજી અમે પાછી ખેંચી લીધી છે. જ્યારે, એડવોકેટ જનરલ પ્રશાંત સિંહે કહ્યું- હાઈકોર્ટ સમક્ષ ત્રણ પ્રકારના કેસ રજૂ કરવામાં આવ્યા હતા. પ્રથમ કેસ રાજ્ય સરકાર દ્વારા દાખલ કરાયેલી તે અરજી સંબંધિત હતો, જેમાં ભોપાલ જિલ્લા અદાલત દ્વારા ગિરિબાલા સિંહને આપવામાં આવેલી આગોતરા જામીન રદ કરવાની માગ કરવામાં આવી હતી. સરકાર વતી સોલિસિટર જનરલ તુષાર મહેતાએ પક્ષ રજૂ કર્યો. મહેતાએ કહ્યું કે, શરતી આગોતરા જામીનના કારણે ફરિયાદી પક્ષને અપેક્ષિત સહયોગ મળી રહ્યો નથી. તેનાથી પુરાવાઓ પર અસર પડી શકે છે. કોર્ટે રાજ્ય સરકારને સંબંધિત પક્ષોને નોટિસ બજાવવાનો નિર્દેશ આપ્યો છે. ગિરિબાલા ઘરેથી નીકળ્યા, મીડિયાના સવાલ પર વકીલ નારાજ, જુઓ તસવીરો… મેટ્રિમોનિયલ સાઇટ પરથી થઈ હતી ટ્વિશા અને સમર્થની મુલાકાત ટ્વિશા અને સમર્થની મુલાકાત મેટ્રિમોનિયલ સાઇટ દ્વારા જાન્યુઆરી 2025માં થઈ હતી. બંનેએ એકબીજાના નંબરની આપ-લે કરી. ત્યારબાદ ફોન પર વાતચીત શરૂ થઈ અને ધીમે ધીમે બંને વચ્ચે પ્રેમ સંબંધ બંધાયા. ઓક્ટોબર 2025માં સમર્થની માતા ગિરિબાલા સિંહ ભોપાલમાં પહેલીવાર ટ્વિશાને મળ્યા. ત્યારબાદ ગિરિબાલા સિંહ, ટ્વિશાના દિલ્હી સ્થિત ઘરે પહોંચ્યા અને બંનેનો સંબંધ નક્કી કરવામાં આવ્યો. 9 ડિસેમ્બર 2025ના રોજ દિલ્હીમાં બંનેના લગ્ન થયા. લગ્નના માત્ર પાંચ મહિના પછી 12 મે 2026ના રોજ સાસરીમાં ટ્વિશાનું શંકાસ્પદ સંજોગોમાં મૃત્યુ થયું. લગ્નના એક મહિના પછી જ વિવાદો થવા લાગ્યા હતા લગ્નના માત્ર એક મહિના પછી જ ટ્વિશા અને સમર્થ વચ્ચે વિવાદ શરૂ થઈ ગયા હતા. ટ્વિશાની ભાભીનો આરોપ છે કે આંતરજ્ઞાતીય લગ્ન હોવાને કારણે તેને સતત નીચું દેખાડવાનો પ્રયાસ કરવામાં આવતો હતો. આ જ કારણે ટ્વિશા ઘણીવાર પોતાનો પક્ષ મજબૂતીથી રજૂ કરતી હતી. પરિવારજનોના મતે, ટ્વિશા સાસરીમાં થતી હેરાનગતિની જાણકારી કોલ અને ચેટ દ્વારા પરિવારને આપતી રહેતી હતી. પરિવાર તેનું ઘર બચાવવા માંગતો હતો, તેથી દર વખતે તેને સમજાવીને ધીરજ રાખવાની સલાહ આપવામાં આવતી હતી. ---------------------------------------- આ મામલા સાથે જોડાયેલા આ સમાચાર પણ વાંચો… એક્ટ્રેસ ટ્વિશાનો પતિ જબલપુર પોલીસની કસ્ટડીમાં:સરેન્ડર કરવા પહોંચ્યો હતો, દિલ્હી AIIMSની ટીમ ડેડબોડીનું ફરી પોસ્ટમોર્ટમ કરશે; CBI તપાસને મંજૂરી એક્ટ્રેસ-મોડલ ટ્વિશા શર્મા કેસમાં આરોપી પતિ સમર્થ સિંહ શુક્રવારે સાંજે જબલપુર જિલ્લા કોર્ટમાં સરેન્ડર કરવા પહોંચ્યો છે. આ પહેલા તેણે હાઈકોર્ટમાં દાખલ કરેલી આગોતરા જામીન અરજી પણ પાછી ખેંચી લીધી હતી. જ્યારે મધ્યપ્રદેશ હાઈકોર્ટે ટ્વિશા શર્માના મૃતદેહનું ફરીથી પોસ્ટમોર્ટમ કરાવવાનો આદેશ આપ્યો છે. વાંચો સંપૂર્ણ સમાચાર…