આજથી IND-AFG વચ્ચે એકમાત્ર ટેસ્ટ:અફઘાની સ્પિનર્સ સામે ભારતીય બેટર્સની કસોટી, આફ્રિકા-ન્યૂઝીલેન્ડે ક્લીન સ્વીપ કર્યું હતું

ઈન્ડિયન ક્રિકેટ ટીમ અંદાજે 8 મહિના પછી કોઈ ટેસ્ટ મેચ રમશે. ટીમની મેચ આજે અફઘાનિસ્તાન સામે થશે. આ મેચ સવારે 9:30 વાગ્યાથી મુલ્લાનપુરના મહારાજા યાદવેન્દ્ર સિંહ સ્ટેડિયમમાં રમાશે. આ મેચમાં અફઘાની સ્પિનર્સ ભારતીય બેટર્સની સ્કિલ્સની કસોટી પણ લેશે. વિરાટ કોહલી, રોહિત શર્મા અને ચેતેશ્વર પૂજારાની નિવૃત્તિ પછી ભારતનું બેટિંગ ઓર્ડર નવું છે. આમાં કેએલ રાહુલ સિવાય કોઈએ પણ 50 મેચ રમી નથી. છેલ્લી સિરીઝમાં ટીમ ઈન્ડિયાને સાઉથ આફ્રિકાએ 2-0થી ક્લીન સ્વીપ કર્યું હતું. કોલકાતા અને ગુવાહાટીની પીચ પર ભારતીય બેટર્સ સ્પિન સામે સંઘર્ષ કરતા જોવા મળ્યા હતા. કેપ્ટન ગિલ સામે 2 સવાલ? 1. નંબર-3 પર કોણ ઉતરશે? કેપ્ટન શુભમન ગિલે નંબર-3 માટે બેટર નક્કી કરવો પડશે. કારણ કે, પૂજારા પછી ટીમમાં આ સ્થાન માટે કોઈ કાયમી બેટર નથી. ટીમે આ સ્થાન પર સાંઈ સુદર્શન અને દેવદત્ત પડિકલ જેવા બેટર્સને અજમાવ્યા છે, પરંતુ અત્યાર સુધી નંબર-3 પર કોઈ કાયમી બેટર મળ્યો નથી. 2. જાડેજાની જવાબદારી કોણ સંભાળશે? રવીન્દ્ર જાડેજાને આરામ આપ્યો છે. તેવામાં સવાલ એ છે કે તેની જવાબદારી કોણ સંભાળશે. કેપ્ટન પાસે રાજસ્થાનના માનવ સુથાર અને વિદર્ભના હર્ષ દુબે જેવા વિકલ્પો છે. માનવ સુથાર પોતાની પરંપરાગત લેફ્ટ આર્મ સ્પિનથી પ્રભાવિત કરી રહ્યા છે, જ્યારે દુબે બોલ અને બેટ બંનેથી યોગદાન આપવાની ક્ષમતા ધરાવે છે. ભારત પાસે 100% જીતનો રેકોર્ડ ભારતના નામે અફઘાનિસ્તાન સામે 100% જીતનો રેકોર્ડ છે. જોકે, બંને વચ્ચે એક જ મેચ રમાઈ છે, જે 2018માં બેંગલુરુના મેદાન પર રમાઈ હતી. આ અફઘાનિસ્તાનની કરિયરની પહેલી ટેસ્ટ પણ હતી. એકંદરે ટેસ્ટ રેકોર્ડની વાત કરીએ તો... ભારતે અત્યાર સુધી 598 મેચ રમી છે. આમાંથી 185 જીતી છે અને 188માં હાર થઈ છે. 224 મેચ ડ્રો રહી છે. એક મેચ ટાઈ પણ થઈ છે. અફઘાનિસ્તાને અત્યાર સુધી 12 ટેસ્ટ મેચ રમી છે. ટીમે 4 મેચ જીતી છે, જ્યારે 7 મેચ ગુમાવી છે. 1 મેચ ડ્રો રહી છે. ગિલ અને રાહુલ ફોર્મમાં, સિરાજ ટૉપ વિકેટ ટેકર ઈન્ડિયન કેપ્ટન શુભમન ગિલ, કેએલ રાહુલ અને યશસ્વી જયસવાલ સારા ફોર્મમાં છે. ગિલે 1 જાન્યુઆરી 2025 પછીથી અત્યાર સુધી 9 મેચમાં 983 રન બનાવ્યા છે. વળી, રાહુલના નામે 10 મેચમાં 813 અને યશસ્વી જયસવાલના નામે 10 મેચમાં 745 રન છે. આ દરમિયાન સૌથી વધુ વિકેટ મોહમ્મદ સિરાજે ઝડપી છે. સ્ક્વોડમાં સામેલ કુલદીપ યાદવ પણ 20 વિકેટ લઈ ચૂક્યો છે. રહમત ટૉપ સ્કોરર, રાશિદને સૌથી વધુ વિકેટ અફઘાનિસ્તાને એક જાન્યુઆરી 2025 પછી માત્ર 2 મેચ રમી છે. આમાં સૌથી વધુ રન રહમત શાહે બનાવ્યા છે. તેણે એક મેચની બે ઇનિંગ્સમાં 158 રન સ્કોર કર્યા છે. જ્યારે રાશિદ ખાન 11 વિકેટ સાથે ટૉપ વિકેટ ટેકર છે. પહેલીવાર ટેસ્ટ મેચની યજમાની કરશે મુલ્લાનપુર સ્ટેડિયમ ન્યૂ ચંદીગઢ સ્થિત મુલ્લાનપુરનું મહારાજા યાદવેન્દ્ર સિંહ સ્ટેડિયમ પ્રથમ વખત ટેસ્ટ મેચની યજમાની કરશે. અહીં અત્યાર સુધી 2 વન-ડે અને એક T20 મેચ રમાઈ છે. હવામાન પણ મેચનું મહત્વનું ફેક્ટર બની શકે છે. અહીં ગરમી ખેલાડીઓની પરીક્ષા લેશે. ટ્રેનિંગમાં કેટલાય ખેલાડીઓને મુખ્ય ગ્રાઉન્ડથી નેટ્સ સુધી પહોંચવા માટે પણ વાહનોનો ઉપયોગ કરવો પડ્યો હતો. અહીં આગામી 5 દિવસ સુધી વરસાદની કોઈ શક્યતા નથી. બન્ને ટીમની સંભવિત પ્લેઇંગ-11 ભારત (IND): શુભમન ગિલ (કેપ્ટન), કેએલ રાહુલ, યશસ્વી જયસવાલ, સાઈ સુદર્શન, રિષભ પંત (વિકેટકીપર), નીતિશ કુમાર રેડ્ડી, વોશિંગ્ટન સુંદર, હર્ષ દુબે/માનવ સુથાર, કુલદીપ યાદવ, મોહમ્મદ સિરાજ, પ્રસિદ્ધ ક્રિષ્ના. અફઘાનિસ્તાન (AFG): હશ્મતુલ્લાહ શાહિદી (કેપ્ટન), અબ્દુલ મલિક, સેદીકુલ્લાહ અટલ, રહમત શાહ, રહેમાનુલ્લાહ ગુરબાઝ (વિકેટકીપર), અઝમતુલ્લાહ ઓમરઝઈ, અફસર ઝઝઈ, શરાફુદ્દીન અશરફ, નાંગેયાલિયા ખારોટે, કાયસ અહમદ અને બિલાલ સામી.