વુમન્સ T20 વર્લ્ડ કપમાં નવમી વખત ભારત vs પાકિસ્તાન:ઈન્ડિયાએ 6 વખત હરાવ્યું; મંધાના-શેફાલી-કેપ્ટન હરમનપ્રીત કૌર પર રહેશે દારોમદાર

વુમન્સ T20 વર્લ્ડ કપમાં આજે ભારત અને પાકિસ્તાન વચ્ચે મહામુકાબલો રમાશે. આ મેચ એજબેસ્ટન સ્ટેડિયમમાં સાંજે 7 વાગ્યે શરૂ થશે. આ ટુર્નામેન્ટમાં બંને ટીમની આ પહેલી મેચ છે. ભારત ગત T20 વર્લ્ડ કપમાં સેમિફાઈનલ સુધી પહોંચ્યું હતું, જ્યારે પાકિસ્તાનની ટીમ ગ્રુપ સ્ટેજથી આગળ વધી શકી નહોતી. ભારત અને પાકિસ્તાન વચ્ચે અત્યાર સુધીમાં કુલ 16 T20 મેચ રમાઈ છે, જેમાંથી ભારતે 13 અને પાકિસ્તાને 3 મેચ જીતી છે. T20 વર્લ્ડ કપમાં બંને ટીમ 8 વખત આમને-સામને આવી ચૂકી છે, જેમાં ભારતે 6 વખત જીત મેળવી છે, જ્યારે પાકિસ્તાન માત્ર 2 જ મેચ જીતી શક્યું છે. ગયા વર્ષે પહેલીવાર વન-ડે વર્લ્ડ કપ જીતનારી ભારતીય ટીમ હવે T20 વર્લ્ડ કપ જીતીને સતત બીજું ICC ટાઇટલ પોતાના નામે કરવા ઈચ્છશે. બીજી તરફ, પાકિસ્તાનની ટીમ તાજેતરમાં જ બાંગ્લાદેશને T20 સિરીઝમાં 3-0થી હરાવીને ટુર્નામેન્ટમાં પહોંચી છે. ફાતિમાની ફિટનેસ પર સસ્પેન્સ શનિવારે પ્રેક્ટિસ દરમિયાન પાકિસ્તાની કેપ્ટન ફાતિમા સના ઈજાગ્રસ્ત થઈ ગઈ હતી. ટીમની સાથી ખેલાડી આયશા ઝફરનો એક શોટ ફાતિમાના જમણા ઘૂંટણ પર વાગ્યો હતો. ઈજા થયા બાદ તે પ્રેક્ટિસ કરી શકી નહોતી. શેફાલી-મંધાના પર મોટી જવાબદારી ભારતની સૌથી મોટી તાકાત તેનું ટૉપ ઓર્ડર છે. 1 જાન્યુઆરી 2025 પછી શેફાલી વર્મા ભારતની સૌથી સફળ બેટર રહી છે. તેણે 21 મેચમાં 159.29ના સ્ટ્રાઈક રેટથી 677 રન બનાવ્યા છે, જેમાં 6 ફિફ્ટી સામેલ છે. બીજી તરફ, સ્મૃતિ મંધાનાએ 18 મેચમાં 572 રન બનાવ્યા છે, જેમાં એક સદી અને ત્રણ અડધી સદી સામેલ છે. રસપ્રદ વાત એ છે કે શેફાલી અત્યાર સુધી T20 વર્લ્ડ કપમાં એક પણ ફિફ્ટી ફટકારી શકી નથી. કેપ્ટન હરમનપ્રીત કૌર ભારતની સૌથી અનુભવી ખેલાડી હશે. તેની કેપ્ટનશીપમાં ભારતે T20 વર્લ્ડ કપમાં 19 મેચ રમી છે, જેમાંથી 13માં જીત અને 6માં હાર થઈ છે. હરમનપ્રીતે 2025 પછી 19 મેચમાં 486 રન બનાવ્યા છે. જેમિમાહ રોડ્રિગ્સ (465 રન), રિચા ઘોષ (268 રન) અને દીપ્તિ શર્મા મિડલ ઓર્ડરને મજબૂતી આપે છે. બોલિંગમાં શ્રી ચરણીએ 2025 પછી 20 મેચમાં 28 વિકેટ ઝડપી છે. દીપ્તિ શર્મા 23 વિકેટ અને અરુંધતિ રેડ્ડી 20 વિકેટ સાથે તેને સારો સાથ આપી રહી છે. ત્રીજા નંબર પર કોને મળશે તક? ભારતીય ટીમ મેનેજમેન્ટ માટે ટીમ સિલેક્શન પણ માથાનો દુખાવો બન્યું છે. ટીમ ત્રીજા નંબર પર યાસ્તિકા ભાટિયા અને ભારતી ફુલમાળીમાંથી કોઈ એકને તક આપી શકે છે. બંને ખેલાડીઓએ તાજેતરના મહિનાઓમાં સારું પ્રદર્શન કર્યું છે. પાકિસ્તાન માટે ફાતિમા સૌથી મોટી આશા પાકિસ્તાનની કેપ્ટન ફાતિમા સના ટીમની સૌથી મહત્વની ખેલાડી છે. તેણે 2025 પછી 12 મેચમાં 335 રન બનાવ્યા છે અને 13 વિકેટ પણ લીધી છે. તેનો બેટિંગ સ્ટ્રાઈક રેટ 183.06 રહ્યો છે. તાજેતરમાં જ તેણે વુમન્સ T20ની સૌથી ઝડપી અડધી સદી ફટકારી હતી. ફાતિમાએ ઝિમ્બાબ્વે સામે માત્ર 15 બોલમાં 50+ સ્કોર કર્યો હતો. પાકિસ્તાનની બેટિંગમાં મુનીબા અલી, આયશા ઝફર અને આલિયા રિયાઝ મહત્વની ભૂમિકા ભજવશે. મુનીબા અલીએ 12 મેચમાં 291 રન બનાવ્યા છે, જ્યારે આયશા ઝફરના નામે એક સદી નોંધાયેલી છે. 21 વર્ષની ઈમન ફાતિમા પણ ટીમની ઊભરતી બેટર છે, જે 2023ના અંડર-19 વર્લ્ડ કપમાં પાકિસ્તાન તરફથી સૌથી વધુ રન બનાવનારી ખેલાડી હતી. બોલિંગમાં પાકિસ્તાનની સૌથી મોટી તાકાત તેની સ્પિન ત્રિપુટી હશે. સાદિયા ઈકબાલે 12 મેચમાં 14 વિકેટ લીધી છે, ફાતિમા સનાના નામે 13 વિકેટ છે, જ્યારે નશરા સંધુ 9 વિકેટ ઝડપી ચૂકી છે. તુબા હસન પણ મિડલ ઓવર્સમાં મહત્વની ભૂમિકા ભજવી શકે છે. હવામાન સાફ રહેશે બર્મિંગહામમાં રવિવારે હવામાન ક્રિકેટ માટે અનુકૂળ રહેવાની ધારણા છે. તાપમાન 10 થી 19 ડિગ્રી સેલ્સિયસ વચ્ચે રહેશે. વરસાદની શક્યતા માત્ર 20 ટકા છે. જોકે, વાદળછાયું વાતાવરણ અને પવનના કારણે શરૂઆતની ઓવરોમાં ફાસ્ટ બોલરોને સ્વિંગ મળી શકે છે. એજબેસ્ટનની પીચ કેવી રહેશે? 21 હજાર દર્શકોની ક્ષમતા ધરાવતા એજબેસ્ટન સ્ટેડિયમની પીચ બેટર્સ અને બોલરો બંનેને મદદ કરે છે. નવા બોલથી ફાસ્ટ બોલરોને મૂવમેન્ટ મળે છે, જ્યારે મેચ આગળ વધતાં સ્પિનરોની ભૂમિકા વધી જાય છે. આ મેદાન પર મહિલા T20 ઇન્ટરનેશનલમાં પ્રથમ ઇનિંગ્સનો સરેરાશ સ્કોર 145 રન છે. 150થી વધુનો સ્કોર ચેલેન્જિંગ માનવામાં આવે છે. અહીં પહેલા બેટિંગ કરનારી ટીમ 10 અને ટાર્ગેટને ચેઝ કરનારી ટીમ 9 મેચ જીતી ચૂકી છે. બન્ને ટીમની સંભવિત પ્લેઇંગ-11 ભારત (IND): સ્મૃતિ મંધાના, શેફાલી વર્મા, યાસ્તિકા ભાટિયા/ભારતી ફુલમાળી, હરમનપ્રીત કૌર (કેપ્ટન), જેમિમાહ રોડ્રિગ્સ, રિચા ઘોષ (વિકેટકીપર), દીપ્તિ શર્મા, શ્રેયંકા પાટિલ, ક્રાંતિ ગૌડ, નંદિની શર્મા અને શ્રી ચરણી. પાકિસ્તાન (PAK): મુનીબા અલી (વિકેટકીપર), ગુલ ફિરોઝા, આયશા ઝફર, આલિયા રિયાઝ, ફાતિમા સના (કેપ્ટન), ઈમન ફાતિમા, ઇરમ જાવેદ, તુબા હસન, ડાયના બેગ, નશરા સંધુ અને સાદિયા ઇકબાલ. મેચ ક્યાં જોઈ શકાશે? મેચનું લાઈવ ટેલિકાસ્ટ સ્ટાર સ્પોર્ટ્સ નેટવર્ક પર થશે, જ્યારે લાઈવ સ્ટ્રીમિંગ જીઓહોટસ્ટાર (JioHotstar) પર ઉપલબ્ધ રહેશે. દિવ્ય ભાસ્કર એપ પર પણ તમે મેચનો LIVE બ્લોગ, ખાસ પળો અને રેકોર્ડ્સ વાંચી શકો છો.