Fuel Prices: પેટ્રોલથી 20 રૂપિયા સસ્તુ માર્કેટમાં આવ્યુ નવુ ઇંધણ, રાજધાનીમાં 48 જગ્યાએ મળશે

E85માં 15 ટકા પેટ્રોલ અને 85 ટકા ઇથેનોલનું મિશ્રણ હોય છે. એટલે કે 1 લિટર E85 ફ્લેક્સ ફ્યુઅલમાં 150 મિલી પેટ્રોલ અને 850 મિલી ઇથેનોલ હશે. હાલમાં દેશભરના પેટ્રોલ પંપ પર મળતા સામાન્ય પેટ્રોલ (E20)માં 20 ટકા સુધી ઇથેનોલ ભેળવવામાં આવે છે. E85ની કિંમત સામાન્ય પેટ્રોલ કરતાં પ્રતિ લિટર 20 રૂપિયા ઓછી રાખવામાં આવી છે. દિલ્હીમાં તેની કિંમત 82.12 રૂપિયા પ્રતિ લિટર જાહેર કરવામાં આવી છે, જ્યારે પેટ્રોલની વર્તમાન કિંમત 102.12 રૂપિયા પ્રતિ લિટર છે.હરદીપ સિંહ પુરીએ ઇન્ડિયન ઓઇલના એક રિટેલ આઉટલેટ પર E85 ફ્યુઅલનું લોન્ચિંગ કર્યું આ ઇંધણ સામાન્ય વાહનો માટે નથી, પરંતુ માત્ર ફ્લેક્સ ફ્યુઅલ વાહનો માટે જ બનાવવામાં આવ્યું છે. શુક્રવારે સાંજે કેન્દ્રીય પેટ્રોલિયમ અને પ્રાકૃતિક ગેસ મંત્રી હરદીપ સિંહ પુરીએ ઇન્ડિયન ઓઇલના એક રિટેલ આઉટલેટ પર E85 ફ્યુઅલનું લોન્ચિંગ કર્યું હતું. દિલ્હીના આ પેટ્રોલ પંપ સહિત 48 સ્થળોએ મળશે E85 કેન્દ્રીય મંત્રીએ દિલ્હીના પૂસા રોડ સ્થિત ઇન્ડિયન ઓઇલના રિટેલ આઉટલેટ પર E85 લોન્ચ કર્યું. આ ઉપરાંત અન્ય 47 પેટ્રોલ પંપ પર પણ E85 ઉપલબ્ધ કરાવવામાં આવ્યું છે. સરકારી તેલ કંપનીઓએ પોતાની 48 રિટેલ આઉટલેટ્સ પર E85નું રોલઆઉટ શરૂ કર્યું છે. કિફાયતી, ટકાઉ અને આત્મનિર્ભર ઇંધણ 85% ઇથેનોલ મિશ્રિત પેટ્રોલ ગ્રીનહાઉસ ગેસ ઉત્સર્જનમાં 61% સુધી ઘટાડો સામાન્ય પેટ્રોલ કરતાં વધુ કિફાયતી 100% આત્મનિર્ભર ઇંધણ તરફનું પગલું ખેડૂતોની આવક વધારવામાં મદદરૂપ ફ્લેક્સ ફ્યુઅલ વાહનો માટે ખાસ તૈયાર કરાયેલ ઇંધણ 6 મહિનામાં 500 અને દોઢ વર્ષમાં 5000 પેટ્રોલ પંપ સુધી વિસ્તરણ પેટ્રોલિયમ મંત્રાલયે આ પહેલને તબક્કાવાર રીતે સમગ્ર દેશમાં વિસ્તૃત કરવાનો નિર્ણય લીધો છે. ડિસેમ્બર 2026 સુધીમાં તેને 500 રિટેલ આઉટલેટ્સ સુધી પહોંચાડવાનું લક્ષ્ય રાખવામાં આવ્યું છે. એટલે કે વર્ષના અંત સુધીમાં દેશના મોટા શહેરોના 500 પેટ્રોલ પંપ પર E85 ઉપલબ્ધ થશે. આ ઉપરાંત ડિસેમ્બર 2027 સુધીમાં દેશભરના 5,000 રિટેલ આઉટલેટ્સ સુધી E85 પહોંચાડવાનો લક્ષ્યાંક નક્કી કરવામાં આવ્યો છે. એટલે કે આગામી દોઢ વર્ષમાં દેશના 5,000 પેટ્રોલ પંપ પર E85 ફ્યુઅલ ઉપલબ્ધ થવાની સંભાવના છે. 12 વર્ષમાં ઇથેનોલ બ્લેન્ડિંગ 1.5%થી વધીને 20% થયું વર્ષ 2014માં પેટ્રોલમાં માત્ર 1.5 ટકા જેટલું ઇથેનોલ ભેળવવામાં આવતું હતું, જે હવે વધીને 20 ટકા સુધી પહોંચી ગયું છે. લોન્ચિંગ પ્રસંગે હરદીપ સિંહ પુરીએ જણાવ્યું કે, "2014માં પેટ્રોલમાં ઇથેનોલનું મિશ્રણ માત્ર 1.53 ટકા હતું, જે આજે વધીને 20 ટકા થયું છે. સરકારે આ લક્ષ્ય નિર્ધારિત સમય કરતાં 5 વર્ષ પહેલાં જ હાંસલ કરી લીધું છે." તેમણે વધુમાં કહ્યું કે આ બદલાવથી દેશને 1.84 લાખ કરોડ રૂપિયાથી વધુની વિદેશી મુદ્રાની બચત કરવામાં મદદ મળી છે અને આશરે 302 લાખ મેટ્રિક ટન ક્રૂડ ઓઇલની આયાતને બદલી શકાયું છે. આ પહેલ દેશના ખેડૂતોના યોગદાનથી શક્ય બની છે, જેઓ હવે માત્ર ‘અન્નદાતા’ જ નહીં પરંતુ ‘ઊર્જાદાતા’ તરીકે પણ ઉભરી રહ્યા છે. સરકારને આશા છે કે આ પહેલથી વર્ષ 2030-31 સુધીમાં ભારતમાં કુલ ઇથેનોલ બ્લેન્ડિંગનું સ્તર આશરે 26 ટકા સુધી પહોંચાડી શકાશે.