PM મોદીની અધ્યક્ષતામાં નીતિ આયોગની બેઠક શરૂ:કર્ણાટકના CM શિવકુમાર, તમિલનાડુના CM વિજય પ્રથમ વખત સામેલ થયા

વડાપ્રધાન નરેન્દ્ર મોદીની અધ્યક્ષતામાં ગુરુવારે દિલ્હીમાં નીતિ આયોગની 11મી ગવર્નિંગ કાઉન્સિલ બેઠક શરૂ થઈ ગઈ છે. આમાં તમામ રાજ્યો અને કેન્દ્રશાસિત પ્રદેશોના મુખ્યમંત્રીઓ, ઉપરાજ્યપાલો, કેન્દ્રીય મંત્રીઓ અને નીતિ આયોગના અધિકારીઓ સામેલ થયા છે. જોકે આ દરમિયાન કર્ણાટકના સીએમ શિવકુમાર, બંગાળના સીએમ શુભેન્દુ અધિકારી અને તમિલનાડુના સીએમ વિજય પ્રથમ વખત સામેલ થયા છે. બેઠકનું મુખ્ય ધ્યાન વિકસિત ભારત-2047નું લક્ષ્ય પુરુ કરવા માટે સર્વસમાવેશક માનવ વિકાસની રણનીતિ તૈયાર કરવી અને તેને દરેક નાગરિક સુધી પહોંચાડવાનું છે. નીતિ આયોગની બેઠકમાં માનવ વિકાસ, રોજગાર, કૌશલ્ય વિકાસ, આરોગ્ય, પોષણ, સમાન તકો અને ડિજિટલ ગવર્નન્સ જેવા મુદ્દાઓ પર ચર્ચા થશે. સાથે જ વિકસિત ભારતના લક્ષ્યને જમીની સ્તરે લાગુ કરવા અને રાજ્યોના વિકાસ વિઝનને રાષ્ટ્રીય વિઝન સાથે જોડવાની રણનીતિ પર પણ મંથન થશે. ડિસેમ્બર 2025માં આયોજિત મુખ્ય સચિવોના રાષ્ટ્રીય સંમેલનની ભલામણો પર પણ વિચાર કરવામાં આવશે. આ વખતે નીતિ આયોગની થીમ: સમાવેશી માનવ વિકાસ આ વર્ષે નીતિ આયોગની બેઠકની થીમ ‘વિકસિત ભારત @2047 માટે સમાવેશી માનવ વિકાસ’ છે. એનો અર્થ એ છે કે 2047 સુધીમાં દરેક ઉંમર, ક્ષેત્ર, લિંગ અને સામાજિક-આર્થિક પૃષ્ઠભૂમિથી પર દરેક ભારતીય સુધી વિકાસનો લાભ પહોંચાડવો. ભારત 2047માં આઝાદીના 100 વર્ષ પૂરા કરશે. કેન્દ્ર સરકારનો લક્ષ્ય ત્યાં સુધીમાં ભારતને વિકસિત રાષ્ટ્ર બનાવવાનો છે. આ માટે GDP વધારવાની સાથે માનવ મૂડીને મજબૂત કરવી, યુવાનોને ભવિષ્ય માટે તૈયાર કરવા, રોજગાર વધારવો, મહિલાઓ અને વંચિત વર્ગોને તકો આપવી અને પ્રાદેશિક અસમાનતાઓને ઘટાડવી પણ જરૂરી છે. આ જ કારણોસર નીતિ આયોગની બેઠકમાં શિક્ષણ, કૌશલ્ય વિકાસ, આરોગ્ય, પોષણ, ઉદ્યોગસાહસિકતા, રોજગાર અને સામાજિક સમાનતા જેવા મુદ્દાઓ પર ખાસ ચર્ચા થશે, જેથી વિકાસનો લાભ દરેક ભારતીય સુધી પહોંચી શકે. બેઠકમાં પ્રથમ વખત સામેલ શિવકુમાર અને વિજય બિન-ભાજપ-NDA શાસિત ત્રણ રાજ્યોના નવા મુખ્યમંત્રીઓ પ્રથમ વખત નીતિ આયોગની ગવર્નિંગ કાઉન્સિલની બેઠકમાં સામેલ થયા. તેમાં કર્ણાટકના ડીકે શિવકુમાર, તમિલનાડુના વિજય અને કેરળના વી.ડી. સતીશનનો સમાવેશ થાય છે. મુખ્યમંત્રી બન્યા પછી, શિવકુમારે વડાપ્રધાન મોદીની શુભેચ્છાઓનો જવાબ આપતા કહ્યું હતું કે તેઓ સહકારી સંઘવાદની ભાવના સાથે કેન્દ્ર સરકાર સાથે મળીને કામ કરશે. આને તેમના પૂર્વવર્તી સિદ્ધારમૈયાના વલણથી અલગ માનવામાં આવી રહ્યું છે. સિદ્ધારમૈયાએ ગયા વર્ષે 24 મેના રોજ આયોજિત નીતિ આયોગની બેઠકમાં ભાગ લીધો ન હતો. તેમણે પહેલા મૈસુરના કાર્યક્રમો અને બાદમાં કેન્દ્ર દ્વારા કર્ણાટકની માંગણીઓની અવગણનાને ટાંકતા બેઠકનો બહિષ્કાર કર્યો હતો. સિદ્ધારમૈયા ઉપરાંત 4 CM ગઈ બેઠકમાં પહોંચ્યા ન હતા નીતિ આયોગની 10મી ગવર્નિંગ કાઉન્સિલની બેઠકમાં સિદ્ધારમૈયા ઉપરાંત, પશ્ચિમ બંગાળના મમતા બેનર્જી, કેરળના પિનરાઈ વિજયન, બિહારના નીતિશ કુમાર અને પુડુચેરીના એન. રંગાસામી હાજર રહ્યા ન હતા. નીતિ આયોગના CEO બીવીઆર સુબ્રમણ્યમ અનુસાર, 36 રાજ્યો અને કેન્દ્રશાસિત પ્રદેશોમાંથી 31એ બેઠકમાં ભાગ લીધો હતો. તેમણે તેને ગવર્નિંગ કાઉન્સિલની સૌથી વધુ ભાગીદારીવાળી બેઠકોમાંની એક ગણાવી હતી. તેમજ, તમિલનાડુના એમ.કે. સ્ટાલિન, તેલંગાણાના મુખ્યમંત્રી રેવંત રેડ્ડી, હિમાચલ પ્રદેશના મુખ્યમંત્રી સુખવિંદર સિંહ સુક્ખુ, ઝારખંડના મુખ્યમંત્રી હેમંત સોરેન અને પંજાબના ભગવંત માન જેવા વિપક્ષ શાસિત રાજ્યોના મુખ્યમંત્રીઓ બેઠકમાં હાજર રહ્યા હતા. --------------------------------- આ સમાચાર પણ વાંચો… મોદીએ કહ્યું- કોંગ્રેસે નિષ્ફળતાનું કલંક હિંદુઓ પર લગાવ્યું: અમે વર્ષોના કામ મહિનાઓમાં કર્યા; શુભેન્દુએ PMને ઝાલમુડી ખવડાવી વડાપ્રધાન નરેન્દ્ર મોદી ભારતના સૌથી લાંબા સમય સુધી સતત સેવા આપનાર ચૂંટાયેલા વડાપ્રધાન બની ગયા છે. તેમના કાર્યકાળના 4,399 દિવસ પૂરા થવા પર ભારત મંડપમમાં આયોજિત NDA બેઠકમાં તેમનું સન્માન કરવામાં આવ્યું. સંપૂર્ણ સમાચાર વાંચો…