જૂનો ફોન વાપરો છો? હેકર્સની છે તમારા OTP પર નજર, જાણો કેવી રીતે બચવું

જ્યારે કોઈ ફોન જૂનો થાય છે અને કંપની તેને અપડેટ આપવાનું બંધ કરે છે, ત્યારે તે ફોન ડિજિટલ રીતે અસુરક્ષિત બની જાય છે અને હેકર્સ સતત આવી ઓપરેટિંગ સિસ્ટમમાં રહેલી ખામીઓ શોધતા હોય છે. બેંકિંગ ફ્રોડ અને OTP ની ચોરી સૌથી મોટું જોખમ નાણાકીય વ્યવહારોમાં રહેલું છે. એક્સપાયર થયેલા ફોનમાં એન્ટી-વાયરસ પ્રોટોકોલ્સ નબળા પડી જાય છે, જેના કારણે હેકર્સ 'સ્ક્રીન મિરરિંગ' અથવા 'મેસેજ હાઇજેકિંગ' જેવા સાધનોનો ઉપયોગ કરી શકે છે. આનાથી તેઓ તમારા બેંક એકાઉન્ટના લોગિન આઈડી અને પાસવર્ડ ચોરી શકે છે. સૌથી ખતરનાક બાબત એ છે કે તેઓ તમારા ફોન પર આવતા OTP (વન ટાઈમ પાસવર્ડ) ને તમારા જાણ્યા વગર વાંચી શકે છે. આ રીતે, તમારા બેંક ખાતામાંથી મિનિટોમાં પૈસા ઉપડી શકે છે અને તમને ટ્રાન્ઝેક્શનનો મેસેજ મળે ત્યાં સુધીમાં ઘણું મોડું થઈ ગયું હોય છે. પ્રાઇવસી અને જાસૂસીનું જોખમ જૂના સ્માર્ટફોનમાં માત્ર ડેટા જ નહીં, પણ તમારી અંગત ક્ષણો પણ જોખમમાં હોય છે. સુરક્ષા અપડેટ્સના અભાવે હેકર્સ રિમોટલી તમારા ફોનનો કેમેરો અને માઇક્રોફોન એક્ટિવેટ કરી શકે છે. આનો અર્થ એ છે કે તમે શું વાત કરી રહ્યા છો અથવા ક્યાં છો, તેની તમામ વિગતો કોઈ અજાણી વ્યક્તિ પાસે પહોંચી શકે છે. તમારા પર્સનલ ફોટા, વીડિયો અને કોન્ટેક્ટ લિસ્ટનો ઉપયોગ બ્લેકમેઇલિંગ કે ડેટા ચોરી માટે થઈ શકે છે. ઘણા કિસ્સાઓમાં, યુઝરને ખબર પણ નથી હોતી કે તેનો ફોન એક જાસૂસી સાધન તરીકે વપરાઈ રહ્યો છે. સુરક્ષિત રહેવા માટેના ઉપાયો જો તમારો ફોન 3 થી 4 વર્ષ જૂનો છે અને તેમાં છેલ્લા ઘણા સમયથી 'Security Update' આવ્યું નથી, તો સાવધ થઈ જવું જોઈએ. આવી સ્થિતિમાં, બેંકિંગ એપ્લિકેશન્સનો ઉપયોગ કરવાનું ટાળવું હિતાવહ છે. જો શક્ય હોય તો, લાંબા સમય સુધી સુરક્ષા અપડેટ્સની ખાતરી આપતા નવા ઉપકરણમાં રોકાણ કરવું એ એક સમજદારીભર્યું પગલું છે. આ ઉપરાંત, અજાણી લિંક્સ પર ક્લિક ન કરવું, માત્ર પ્લે સ્ટોર પરથી જ એપ ડાઉનલોડ કરવી અને નિયમિતપણે તમારા મહત્વના એકાઉન્ટ્સના પાસવર્ડ બદલતા રહેવું એ તમારી સુરક્ષા માટે અનિવાર્ય છે. આ પણ વાંચો: ChatGPT Images 2.0: ડિઝાઇનર્સ માટે સારા સમાચાર, હવે ઇમેજમાં ટેક્સ્ટ લખવું બન્યું સરળ!